BQO-da múmkindigi shekteýli otbasyna qaıyrymdy jandar úı alyp berdi

ORAL. QazAqparat – BQO-nyń Terekti aýdanynda aýyl turǵyny Amanjan Esenov qaıyrymdy jandardyń kómegimen úıli boldy, dep habarlaıdy QazAqparat tilshisi.

Aýdandyq «Birlik» qoǵamdyq birlestiginiń tóraǵasy, teolog Baǵdat Adaıhannyń sózine qaraǵanda, A.Esenov Abaı aýylyna ótken jyly kúzde kóship kelgen.

Birlestiktiń jumysy namaz oqıtyn jamaǵattyń halin bilip, járdemdesý bolǵandyqtan, B.Adaıhan A.Esenovtiń de jaǵdaıymen tanysqan. Ózi – birinshi top múgedegi, zaıyby Gúlbaqyttyń densaýlyǵynda da kinárat bolyp shyqty. Erli-zaıyptylardyń Abaı aýylynan alǵan úıleri qulaǵaly turǵan, tipti jóndeýge de kelmeıdi eken.

Esenovter otbasynyń osy múshkil halin Terekti aýdandyq «Terekti jańalyǵy» gazetiniń redaktory Ádilet Orynbasarov ta kózimen kórip, másele etip kóterip, halyqty qarjylaı úles qosýǵa shaqyrdy.

«Birlik» qoǵamdyq birlestigimen birlese otyryp, janashyr adamdardyń qoldaýymen bir aıǵa jeter-jetpes ýaqytta qajetti qarjy (1 mln teńge) jınaldy. Qaıyrymdylyq tanytqandar arasynda oblys qana emes, sonaý Amerıkada turatyn qandastarymyz da bar. Osylaısha Amanjan baýyrymyz Aqjaıyq aýylyndaǵy tórt bólmeli úıge qol jetkizdi», deıdi Á.Orynbasarov.

Baspana kiltin Oraldan arnaıy kelgen BQO ortalyq meshitiniń naıb ımamy Samat Álibaev tapsyrdy. Aqjaıyq aýyldyq okrýginiń ákimi Bolat Qadralıevtiń de Esenovter otbasyna azyq-túlikten kómektesip turatyndyǵyn aıta ketken jón.

Eske sala keteıik, budan buryn BQO-da volonterdiń uıymdastyrýymen taǵy bir jalǵyzbasty ananyń baspanaly bolǵanyn, Oralda 284 otbasynyń páterge qol jetkizgenin jazǵan bolatynbyz.