BQO-da múgedekti turǵyn úı kezeginen zańsyz shyǵaryp tastaǵan

ORAL. QazAqparat - Bókeı ordasy aýdany prokýratýrasy «Turǵyn úı qatynastary týraly» QR Zańynyń qoldanýyna tekserý júrgizý barysynda ekinshi toptaǵy múgedek R.Hamıtovtyń turǵyn úı kezeginen zańsyz shyǵarylyp tastalǵandyǵyn anyqtady, dep habarlaıdy «QazAqparat» HAA tilshisi.

BQO prokýratýrasynyń baspasóz qyzmetinen túsken málimetke qaraǵanda, turǵyn úıge muqtaj azamattardy esepke qoıý jáne turǵyn úı berý jónindegi aýdandyq komıssııa ótken jylǵy 8 jeltoqsanda atalmysh zańnyń 73-baby 1-tarmaǵy 4-tarmaqshasyn  negizge alyp, R.Hamıtovty turǵyn úıge muqtaj azamattar esebinen shyǵarǵan. Zań talaptaryna sáıkes úı kezeginde turǵan azamat jer telimin alǵan jáne úıin salyp bitirgen nemese satyp alǵan jaǵdaıda ǵana tizimnen syzylady. Alaıda tekseris barysynda R.Hamıtovtyń turǵyn úı kezegine turǵan 2010 jylǵy shilde aıynan beri turǵyn úı nemese jer telimin almaǵandyǵy belgili boldy.

Aýdan prokýratýrasynyń usynysymen tizimnen zańsyz shyǵarylǵan ekinshi toptaǵy múgedek R.Hamıtov qaıtadan esepke qoıylyp, onyń konstıtýtsııalyq quqyǵy qorǵaldy. Sonymen qatar aýdandyq turǵyn úı-kommýnaldyq sharýashylyq bóliminiń bas mamany J.Muhıtov tártiptik jaýapkershilikke tartyldy.