BQO-da meıirimdi jandardyń kómegimen jas jigit pen onyń anasy baspanaly boldy
Syrym aýdandyq «Syrym eli» gazetiniń dırektor-redaktory, aqyn Baýyrjan Shırmedınulynyń aıtýynsha, 23 jastaǵy Altynbek Qurmanǵazıevtiń taǵdyry kishkentaıynan qıyn qalyptasqan.
Ákesin kórip úlgermegen ol ár jerde bilim aldy, júk tasýshy, keıin aspaz mamandyǵyn meńgerdi. Joqshylyqtyń kesirinen anasy densaýlyǵynan aıyryldy. Syrqat anasymen páter jaldap, kún keshken Altynbek ımandylyqqa bet buryp, meshitke keldi. Syrym aýdandyq ortalyq meshitiniń bas ımamy Ádilhan Naýryzbaıdyń tarapynan jylylyq tapty.
Jigittiń qıyn taǵdyry týraly B.Shırmedınuly «Anamdy qaıda aparamyn?» degen taqyrypta maqala jazyp, halyqtan qoldaý surady.
Bir aptanyń ishinde 2 mln 246 myń teńge jınalyp, aýdan ortalyǵy Jympıtyǵa jalǵasyp jatqan Óleńti aýylynan gaz, sýy bar 6 bólmeli úı satyp alyndy. Baspanaǵa qajetti turmystyq tehnıka, jıhaz, ydys-aıaq, úıdiń ishi-syrtyn retke keltirý de umyt qalǵan joq.
4 maýsym – Memlekettik rámizder kúni A.Qurmanǵazıevke úıdiń kilti tabys etildi.
Rásimge qatysqan aýdan ákiminiń orynbasary Aslanbek Sarqulov osy ıgilikti istiń basy-qasynda aýyl azamaty Temirlan Ǵabbasovtyń da júrgenin jetkizip, oblystyq ortalyq meshitke, qolushyn sozǵandardyń bárine alǵysyn aıtty.
«Osylaısha aýdandyq gazettiń qoldaýymen ekinshi otbasy úıli bolyp otyr. Buǵan deıin «Gazetten jasalǵan úı» jobasymen Kógeris aýylynda úsh balaly ana baspanaǵa qol jetkizgen edi», deıdi A.Sarqulov.
QMDB janyndaǵy «Zeket» qaıyrymdylyq qorynyń BQO-daǵy ókili, oblystyq ortalyq meshittiń naıb ımamy Samat Álibaev bas múftı Naýryzbaı qajy Taǵanulynyń bastamasymen, atalǵan qordyń qoldaýymen «El úlesi – páterge» jobasy aıasynda 232-inshi otbasy baspanaly bolyp jatqanyn atap ótti.
«Nur Otan» partııasynyń Syrym aýdandyq fılıalynyń tóraǵasy Talǵat Darǵojıev ıgi tilegin bildirip, jańa úı ıesine qysqa tolqyndy peshti syıǵa tartty.
«Karantın kezinde kafe, meıramhanalar jabylǵandyqtan, Altynbek jumyssyz qalǵan edi. Bul másele de sheshimin tapty. Aǵalarynyń qoldaýymen Altynbek Jympıty aýylynda salynyp jatqan jańa meshitke kúzetshi bolyp jumysqa turdy», dedi QazAqparat tilshisine Baýyrjan Shırmedınuly.
Eske sala keteıik, budan buryn BQO-da múmkindigi shekteýli otbasyna qaıyrymdy jandar úı alyp bergenin jazǵan bolatynbyz.