BQO-da memlekettik qyzmetshilerdiń avtokólikti masań kúıde júrgizgeni anyqtaldy
QR Memlekettik qyzmet isteri agenttigi BQO boıynsha departamentiniń basshysy Murat Baısalovtyń óńirlik kommýnıkatsııalar qyzmeti alańynda ótken brıfıngide málim etkenindeı, Kaztalov jáne Báıterek aýdandary ákimdikteri, kóliktegi sanıtarııalyq-epıdemıologııalyq baqylaý, memlekettik kirister, qazynashylyq departamentteriniń memlekettik qyzmetshileri avtokólik rýline masań kúıde otyrǵan.
Departament basshysynyń sózine qaraǵanda, sondaı-aq oblystyq veterınarııalyq baqylaý jáne qadaǵalaý, agroónerkásiptik keshendegi memlekettik ınspektsııalarynyń qyzmetshileri qoǵamdyq oryndarda alkogoldik ishimdikterdi ishkeni jáne qoǵamdyq oryndarǵa masań kúıde kelgeni úshin ákimshilik jaýapkershilikke tartylǵan.
Sol sekildi Terekti aýdany ákimi apparatynyń qyzmetshisi usaq buzaqylyq jasaǵany úshin sot organdarymen ákimshilik jazaǵa ilikti.
Oǵan qosa oblystyq memlekettik kirister, qazynashylyq departamentteriniń qyzmetshileri qorshaǵan ortany saqtaýǵa jáne lastamaýǵa qatysty talaptardy saqtamaı, ortaq paıdalanylatyn oryndardy, saıabaqtardy, skverlerdi lastaǵany, onyń ishinde belgilenbegen oryndarǵa kommýnaldyq qaldyqtardy tastaǵany úshin ákimshilik jazasyz qalmady. Al Báıterek, Bórli, Syrym, Shyńǵyrlaý aýdandary jáne Oral qalasy ákimdikteriniń laýazymdy tulǵalary men qyzmetshileri beıádep minez-qulyq kórsetken.
Osy derekter boıynsha kináli tulǵalar tıisti tártiptik jaýapkershilikke tartyldy, derbes jaǵdaılarda tártiptik ister ádep jónindegi keńestiń otyrystarynda qaraldy.
M.Baısalovtyń aıtýynsha, óńirdegi ádep jónindegi keńeste toǵyz aıda 30 másele qaralsa, sonyń 24-i nemese 80 paıyzy zańbuzýshylyqtyń aldyn alýǵa arnaldy.
Departament málimeti boıynsha oblysta baqylaý sharalary nátıjesinde memlekettik qyzmet týraly zańnamany buzýǵa qatysty 1 690 derek anyqtaldy. Memlekettik organdar kóbinese memlekettik qyzmetshilerdiń issaparǵa barý (590), eńbek demalysyna shyǵý (269), baǵalaý júrgizý (249) jáne laýazymdyq nusqaýlyqtaryn jasaý jáne bekitý tártibin (237) saqtamaıdy. Atalǵan jaıt Aqjaıyq, Báıterek, Jánibek, Tasqala, Terekti aýdandary jáne Oral qalasy ákimdikterinde, oblystyq memlekettik kirister departamentiniń qyzmetinde bolǵan.
«Merıtokratııa qaǵıdatyn jáne konkýrs rásimderin zańnamanyń talaptaryna sáıkestigin qamtamasyz etý maqsatynda keshendi taldaý júrgizý tájirıbesi engizildi. Nátıjesinde memlekettik qyzmetke túsý tártibin jáne onyń ashyqtyǵyn qatań baqylaýǵa alýǵa múmkindik berdi. Osylaısha, departament qyzmetkerleri jyl basynan beri 18 konkýrsqa baıqaýshy retinde qatysyp, zańnamanyń 93 buzýshylyǵyn anyqtady. 26 laýazymdy qyzmetker ákimshilik jaýapkershilikke tartyldy, 3 konkýrstyq komıssııa sheshimderiniń kúshi joıylyp, konkýrstar qaıta ótkizildi», - dedi M.Baısalov.