BQO-da memlekettik qyzmetshige shabýyl jasaǵandar ustaldy
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 3 naýryzǵa qaraǵan túni Terekti aýdany ortalyǵy Fedorov aýylynda bolǵan.
Terekti aýdany turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń úıine úsh adam zańsyz basyp kirip, kúsh qoldanamyz dep qaýip tóndirgen.
Atalǵan derek boıynsha QR QK 389-baby 3-bóligi (ózinshe bılik etý) jáne 149-baby 2-bóligine (turǵynjaıǵa zańsyz basyp kirý) sáıkes qylmystyq is qozǵaldy.
Kúdiktilerge qatysty sotpen eshqaıda ketpeý jóninde qolhat berý sharasy qoldanyldy.
Dáleldemelerdi bekitý maqsatynda jedel tergeý amaldary júrgizilýde.
Aýyl turǵyndarynyń sózine qaraǵanda, oqıǵa memlekettik satyp alýǵa baılanysty týyndaǵan. Bólim basshysy Aslan Daýbaevtan konkýrsta utylyp qalǵan mekeme atynan kelgender memlekettik satyp alýdyń qorytyndysyn qaıta qaraýdy talap etken. Memlekettik qyzmetshi zańǵa súıenip, buǵan ılikpegen. Sodan ashýǵa mingen kúdiktiler qoqan-loqqy jasap, kúsh qoldanbaq bolǵan.
Oblystyq densaýlyq saqtaý basqarmasy jábirlenýshiniń aýrýhanaǵa júgingenin, denesiniń ár jeri azdap kógergenin jetkizdi.