BQO-da memqyzmetshiler 228 myń teńgeniń syılyqtaryn arnaıy qorǵa tapsyrdy

ORAL. QazAqparat - Batys Qazaqstan oblysynda memlekettik qyzmetshiler arnaıy qorǵa ótken jyly 228 myń teńgeniń syılyqtaryn tapsyrǵan, dep habarlaıdy «QazAqparat» tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basshysy, ádep jónindegi keńes tóraǵasy Bolat Isaqovtyń aıtýynsha, bul aldyńǵy jylǵydan edáýir kóp. 2016 jyly arnaıy qorǵa 68 700 teńgeniń syılyqtary tapsyrylǵan bolatyn. Memlekettik qyzmetshilerge syılyqty alýǵa jáne berýge tyıym salynǵany belgili.

Oǵan qosa ótken jyly departament 4 867 memlekettik qyzmetshiniń áleýmettik jelilerdegi akkaýnttaryna monıtorıng júrgizip, sonyń 186-synan Ádep kodeksi talaptaryna qaıshy keletin fotosýretterdi anyqtady. Usynbalar nátıjesinde 48 memlekettik qyzmetshi jazaǵa tartylyp, ádepke qaıshy fotosýretter joıyldy.

Memlekettik qyzmet zańnamasynyń buzylmaýyn baqylaý aıasynda 53 tekserý júrgizilip, sonyń barysynda memlekettik qyzmet zańnamasyn jáne qyzmettik etıkany buzýdyń 731 faktisi anyqtaldy. Ádep jónindegi keńes usynystaryna sáıkes 28 laýazymdy qyzmetker tártiptik jazaǵa tartyldy.

Aıta keteıik, bıylǵy 1 qańtarǵa óńir boıynsha 461 memlekettik organ qyzmet atqarýda. Olardaǵy shtat sany 4 423 bolsa, memlekettik qyzmetshilerdiń naqty sany - 4155. Bos oryndar - 268.