BQO-da mektep psıhologteriniń kóbi syrttaı bilim alǵan

<p>ORAL. KAZINFORM &ndash; Batys Qazaqstan oblysynda mektepterde 426 psıholog bolsa, sonyń 208-i nemese 49 paıyzy syrttaı bilim alǵan. 76-sy nemese 18 paıyzy &ndash; úsh jylǵa deıin tájirıbesi bar jas mamandar.</p>

BQO prokýrorynyń birinshi orynbasary Dáýren Omarǵalıevtiń málim etkenindeı, psıhologtardyń jumysy jasóspirimder arasynda sýıtsıd sııaqty jaǵymsyz úrdisti azaıtýǵa kómektespeı otyr. Onyń sózine qaraǵanda, tómen jalaqyǵa baılanysty kadrlardyń jıi aýysýy baıqalady, sapaly psıhologııalyq qoldaý kórsetý úshin qajetti jaǵdaılar jasalmaǵan.

«Bıyl biz barlyq orta mektepti tekserip, psıhologtardyń qyzmeti formaldy túrde júzege asyrylatynyn anyqtadyq. Mysaly, Báıterek aýdanyndaǵy mektepterdiń biriniń psıhology 57 oqýshyny táýekel tobyna engizgen. Alaıda balalarmen jáne olardyń ata-analarymen jumys jasalmaǵan. Al Darııan keshki mektebiniń shtatynda psıholog múldem kózdelmegen. Oqý-aǵartý mınıstriniń buıryǵy boıynsha bilim berý uıymynyń shtatynda psıhologtyń bolýy mindetti», - deıdi D. Omarǵalıev.

BQO prokýrorynyń birinshi orynbasary oǵan qosa balalar sýıtsıdimen baılanysty qylmystyq isterdi tergeý sapasyz júrgiziletinin jetkizdi. Bıylǵy jyly mundaı 9 qylmystyq istiń tek ekeýi (Báıterek, Bókeı ordasy) boıynsha saraptamalar taǵaıyndalǵan. Sonyń saldarynan bul ister boıynsha sheshimder oqıǵanyń barlyq mán-jaıy anyqtalmastan, merziminen buryn qabyldanady.

«Nátıjesinde tergeýdiń tolyq bolmaýyna jáne balalardyń mundaı sharasyz qadamǵa barý sebepteriniń anyqtalmaýyna baılanysty 6 isti toqtatý týraly sheshimderdi buzdyq. Endi balanyń ózine-ózi qol jumsaǵany týraly habarlamalar boıynsha tergeýdiń sapasy men ýaqtylylyǵyn qamtamasyz etý úshin prokýror oqıǵa ornyna baryp, mundaı isterdi arnaıy baqylaýǵa alady», deıdi D.Omarǵalıev.

Onyń aıtýynsha, polıtsııa bul habarlamalardy sotqa deıingi tergep-tekserýlerdiń biryńǵaı tizilimine dereý tirkep, balalar arasynda sýıtsıdtik minez-qulyq týdyratyn kontentke taldaý jasaý úshin áleýmettik jeliler men ınternet platformalarǵa turaqty túrde monıtorıng júrgizýge mindetti.

Eger olardyń ıeleri anyqtalǵan rette ózine-ózi qol jumsaýdy nasıhattaǵany úshin olardy jaýapkershilikke tartý sharalaryn qabyldaıdy.

BQO prokýratýrasy tek osy jyly sýıtsıdtik baǵyttaǵy 20-dan astam kanaldy buǵattaý úshin «Kıbernadzor» júıesine engizgen.

Eske sala keteıik, budan buryn BQO-da sońǵy 5 jylda otbasylyq-turmystyq qylmystardyń úsh esege óskenin jazǵan bolatynbyz.