BQO-da maıdannan oralmaǵan sarbazdyń deregi 80 jyldan keıin tabyldy

ORAL. QazAqparat – Batys Qazaqstan oblysynda maıdannan oralmaǵan Sham (Shamıl) Jákibaıulynyń deregi 80 jyldan keıin tabyldy, dep habarlaıdy QazAqparat tilshisi.

Aqsaı qalasynyń turǵyny, 86 jastaǵy Muratbaı Yqylasuly Súıinǵaraevtyń aıtýynsha, Sham — ákesiniń inisi.

Onyń deregin uly Berik «Pamıat naroda» saıty arqyly tapqan.

«Atam Jákibaı óte saýatty bolǵan. 1918 jyly dúnıege kelgen ulyna Sham degen esim bergen. Sırııanyń qazirgi astanasy Damaskiniń buryn Sham dep atalǵany belgili. Mine, áskerı sheni serjant bolǵan sol aǵamyz 1943 jyly 3 qańtarda Kalının (qazir Tver) oblysy Olenın aýdany Osınovka degen jerde oqtan qaza tapqan. Osy derek 80 jyl 4 aı degende anyqtalyp otyr», - deıdi aqsaqal.

Ardagerdiń uly, ishki ister organdarynyń ardageri, polıtsııa podpolkovnıgi Azamat Súıinǵaraevtyń sózine qaraǵanda, saıtta Sham Jákibaıuly Shamıl Djakıbaev dep oryssha jazylǵan. Mekenjaıy Chkalov (Orynbor) oblysy, Chebonkı stantsııasy, Astyq sovhozy, 3-bólimshe; áıeli Týhvatova Ramılıa nemese Karıma (oqylýy qıyn) dep kórsetilgen. Ókinishke qaraı, Shamnan urpaq qalǵan joq.

Muratbaıdyń óz ákesi, Shamnyń aǵasy, 1914 jylǵy Yqylas (Ihlas) Súıinǵaraev ta soǵystan qaıtpaǵan. Atalmysh saıttan alynǵan málimetke qaraǵanda, qatardaǵy jaýynger Yqylas Jákibaıuly qyzyl áskerge 1942 jyly 22 aqpanda alynyp, 21-gvardııa atqyshtar dıvızııasy 69-polki quramynda bolǵan. 1944 jyly 20 qazanda jaýdyń qarsy shabýylyn toıtarý kezinde batyrlyq tanytqany úshin «Erligi úshin» medalimen marapattalǵan. Jaraly bolsa da, alǵan betinen qaıtpaǵan. 1945 jyly 20 aqpanda qaza tapqan sarbaz Latvııa Respýblıkasy Týkým aýdany Djýkste aýylyndaǵy baýyrlastar zıratynda jerlengen. Qulpytastaǵy tizimde «serjant I.D.Saıýngaraev» dep jazylǵan. Yqylastan Muratbaı men Ǵabbas atty eki ul qalǵan, olar ákelerin árdaıym eske alyp otyrady.

«Qazaqstanda soǵys sharpymaǵan shańyraq kemde-kem. Ákem Muratbaı men anam 65 jyl ótkennen keıin atamyzdyń jerlengen jerin bilgen edi. Sonyń nátıjesinde osydan 11 jyl buryn ákem Muratbaıdyń bastamasymen aǵam Shamıl (Shamnyń qurmetine qoıylǵan) men apam Alfııa atamyzdyń basyna baryp, taǵzym etip qaıtty. Sham men Yqylas Jákibaıulylar 1942 jyly maıdanǵa birge attanǵan, aqyry ekeýi de elge oralmady. Bıyl Jeńis kúni qarsańynda aǵasy Shamnyń deregi tabylǵan kezde ákem Muratbaı qatty tolqydy. Anamyz ekeýi on bala tárbıelep ósirgen, men úıdiń kenjesimin. Endi, buıyrsa, Sham atamyzdyń basyna baryp, táý etip qaıtýdy oılastyrmaqshymyz», - dedi QazAqparat tilshisine Azamat Súıinǵaraev.

Eske sala keteıik, budan buryn Oralda Ivan Gapıchke Altyn juldyz ben «Otan» ordeni tabys etilgenin jazǵan edik.

Sondaı-aq 98 jastaǵy Venıamın Skalenko aǵa býynnyń erligi men eńbegin umytpaý kerektigin aıtty.