BQO-da mal urlyǵymen aınalysqan qylmystyq top quryqtaldy
BQO polıtsııa departamentiniń resmı ókili, polıtsııa polkovnıgi Bolatbek Nurǵojınniń málim etkenindeı, qazirgi kezde tórt er adamnyń birqatar aýyr qylmystarǵa qatysy tekserilýde.
Qylmystyq top 11 qarasha kúni Terekti aýdany Podstepnyı kenti mańyndaǵy Samara-Shymkent tas jolynda qolǵa tústi.
«1980, 1985, 1985 jáne 1988 jylǵy kúdiktiler bıylǵy shildeden bastap birqatar aýyr qylmys jasaǵany úshin krımınaldyq polıtsııa basqarmasynyń nysanasyna ilikken edi. Sol kúni olar Terekti aýdany Bekeı aýyly tusynda erkin jaıylymnan bir jylqyny urlap áketken. Onyń ushasy ustaý kezinde «VAZ-2111» kóliginen tabyldy. Jaýap alý barysynda qolǵa túskenderdiń biri 2021-2022 jyldary Aqjaıyq, Kaztalov jáne Terekti aýdandary aýmaǵynda mal urlyǵynyń 10 epızodyna, sondaı-aq 2021 jyldyń 18 naýryzynda kompanııa keńsesine jasalǵan qaraqshylyq shabýylǵa qatysqanyn moıyndady», dedi B.Nurǵojın.
Kúdiktiler QR Qylmystyq is júrgizý kodeksiniń 128-baby tártibimen Terekti aýdany ýaqytsha ustaý ızolıatoryna qamaldy.
QR QK 188-1-babyna sáıkes dáleldemelik bazany jınaý, olarmen qylmystyq baılanysy bar adamdar tobyn anyqtaý, sondaı-aq kúdiktilerdiń BQO aýmaǵynda jasalǵan mal urlyǵynyń ashylmaǵan derekterine qatysy boıynsha tergeý amaldary júrgizilýde.