BQO-da mal urlaýmen aınalysqan aǵaıyndy barymtashylar ustaldy
BQO polıtsııa departamentiniń resmı ókili Bolatbek Belgibekovtiń málim etkenindeı, departamenttiń krımınaldyq polıtsııa jáne Aqjaıyq aýdany polıtsııa bólimi qyzmetkerleri júrgizgen jedel izdestirý sharalary barysynda 1978, 1982 jáne 1987 jylǵy aǵaıyndylardyń uıymdasqan qylmystyq toby áshkerelendi.
Olarǵa qatysty QR QK 188-baby 4-bóligine sáıkes úsh epızod boıynsha qylmystyq is qozǵalyp, tergeý amaldary júrgizilýde.
Kúdiktilerdiń mekenjaıynan sondaı-aq ańshy jáne atys qarýy, oq-dáriler men pyshaqtar tabyldy. Bul derek boıynsha QR QK 287-baby 3-bóligine (qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) sáıkes tergeý júrgizilýde.
Qazirgi tańda aq-adal maly qoldy bolǵan barlyq jábirlenýshiler anyqtalýda. Joǵalǵan jylqylar osy úıir ishinen tabylǵan jaǵdaıda ıelerine qaıtarylady.
«Áleýmettik jelilerde atalǵan is boıynsha shyndyqqa janaspaıtyn málimet taraýda. Osyǵan baılanysty kórineý jalǵan aqparat taratqandar QR QK 274-babyna sáıkes qylmystyq jaýapkershilikke tartylatynyn eskertkim keledi. Karantın kezinde jábirlenýshilerdiń polıtsııa bólimine baryp júrýiniń qajeti joq. Polıtsııa qyzmetkerleri ózderi baryp, tergeý amaldaryn júrgizetin bolady. Kúni búgin tabylǵan maldardyń bárin Aqjaıyq aýdany polıtsııa bólimi jergilikti ákimdikpen birlesip baǵý jáne saqtaý jumystaryn qolǵa aldy», dedi QazAqparat tilshisine B.Belgibekov.