BQO-da qyzylshamen aýyrǵan balalardyń kópshiligi ekpe almaǵan
BQO Sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, jyl basynan beri oblysta qyzylshanyń 19 jaǵdaıy tirkelgen.
Onyń sózine qaraǵanda, naýqastardyń kópshiligi – densaýlyǵyna baılanysty ekpe almaǵan balalar. Sondaı-aq ekpe alý merzimi áli kelmegen 1 jasqa deıingi sábıler jáne ata-anasy ekpeden bas tartqan balalar.
Aýyrǵandardyń 63 paıyzy Oral qalasy, 26,3 paıyzy Aqjaıyq, 5,2 paıyzy Qaratóbe men Báıterek aýdanynyń úlesine tıedi.
Qyzylsha oshaqtarynda baılanysta bolǵandarǵa medıtsınalyq baqylaý ornatyldy. Sonymen qatar epıdemıologııalyq kórsetkishter boıynsha qarym-qatynasta bolǵandarǵa qyzylshaǵa qarsy ekpe salyndy.
Departament basshysynyń aıtýynsha, birneshe jyl boıy ekpeden bas tartqan ata-analar sany kóbeıip otyr. Mysaly, ótken jyldyń birinshi jartyjyldyǵymen salystyrǵanda, ekpeden bas tartqandar sany 44,2 paıyzǵa ósti.
«Bıylǵy alty aıdyń qorytyndysy boıynsha óńirde epıdemıologııalyq jaǵdaı salystyrmaly túrde turaqty. Jyl basynan beri toptasqan aýrýshańdyq, qutyrý, tyrysqaq, oba, túıneme, dıfterııa, qyzamyq, ish súzegi, polıomıelıt, bezgek, sirespe aýrýlary tirkelgen joq. Degenmen jiti ishek ınfektsııalary 2,5 esege artty, bulardyń deni 14 jasqa deıingi balalar arasynda tirkeldi. Sonymen qatar 21 naýqas dızenterııaǵa shaldyqty. 13 adam jedel vırýsty A gepatıtimen syrqattanǵan», - dedi M.Aryspaev.
Eske sala keteıik, budan buryn Batys Qazaqstanda jedel ishek ınfektsııalary 14 esege ósip ketkenin jazǵan bolatynbyz.