BQO-da qylmystyq top maldy atyp alyp ketip otyrǵan
BQO polıtsııa departamenti krımınaldyq polıtsııa basqarmasynyń bastyǵy, polıtsııa polkovnıgi Erlan Arystanovtyń málim etkenindeı, Batys Qazaqstan jáne kórshiles Atyraý oblysy aýdandarynda mal urlyǵymen aınalysqan top uzaq ýaqyt boıy júrgizilgen jedel izdestirý sharalary barysynda 13 naýryz kúni qolǵa tústi.
BQO-nyń úsh turǵyny qamaýǵa alynyp, basqa da ashylmaǵan mal urlyǵyna qatystylyǵy tekserilýde.
E.Arystanovtyń sózine qaraǵanda, belgisiz adamdardyń maldy, negizinen jylqyny atyp alýmen aınalysatyny jóninde habar ótken jyly túsken. Olar maldyń etin ǵana alyp, basy men ishek-qarnyn oqıǵa ornynda qaldyryp ketip otyrǵan. Taıpaq polıtsııa bóliminiń qyzmetkerleri maldyń terisi, basy men ishek-qarnyn tapqan. Eki oblys turǵyndarynan túsken aryz nátıjesinde mal ıeleri tabyldy. Olar Atyraý oblysy Inder aýdanynyń turǵyndary bolyp shyqty.
«Qazirgi kezde Atyraý oblysynyń úsh, sondaı-aq Batys Qazaqstannyń birneshe turǵyny jábirlenýshi retinde tirkeldi. Barlyq aryzdar boıynsha mal erkin jaıylyp júrgen jerinen urlanǵan. Arnaıy jedel tergeý toby qurylyp, jumys isteýde. Tolyq aqparat tergeý aıaqtalǵannan keıin beriletin bolady», dedi E.Arystanov.
Aıta keteıik, ótken jyly qabyldanǵan is-sharalar nátıjesinde mal urlyǵy aldyńǵy jylǵydan 16 paıyzǵa azaıdy (2019 jyly – 411, 2020 jyly – 344). Osynyń 271-i nemese 78,8 paıyzy maldyń erkin jaıylyp júrgen jerinen urlanǵan. 73 jaǵdaıda ǵana (21,2 paıyz) mal qoradan qoldy bolǵan.
Urlanǵan maldyń 69,4 paıyzy ıelerine qaıtarylǵan.
Bıylǵy eki aıda oblys aýmaǵynda 38 (2020 jyly osy merzimde – 70, 45,7 paıyzǵa az) mal urlyǵy tirkelip, sonyń 21-i ashyldy.