BQO-da koronavırýstan kóz jumǵandardyń 84,3 paıyzy – egde jastaǵy adamdar

ORAL. QazAqparat – Batys Qazaqstan oblysynda vaktsınatsııalaý jumysy bastalǵannan beri 29 747 adam koronavırýs juqtyrsa, sonyń 9520-y nemese 32 paıyzy –alpys jastan asqandar, dep habarlaıdy QazAqparat tilshisi.

BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmeti alańynda ótken brıfıngide málim etkenindeı, sol 9520 naýqastyń 75 paıyzy (7131) ınfektsııalyq statsıonarlarda em aldy.

Ókinishke qaraı, koronavırýstan kóz jumǵandardyń 84,3 paıyzy – egde jastaǵy adamdar.

Onyń aıtýynsha, oblys boıynsha vaktsına alǵandardyń 13 paıyzy ǵana (30 myńǵa jýyq) – 60 jastan asqandar.

Kúni búginge deıin óńirde 239 535 adam vaktsınanyń І komponentimen egildi. Sonyń 173 218-i «Spýtnık V», 13 488- i «QazVac», 24 973-i «Hayat-Vax», 7 717-si «Corona-Vac», 20 139-y «Vero Cell» vaktsınasyn aldy.

Oǵan qosa 218 450 adam ІІ komponentpen egilip úlgerdi. «Barlyq turǵyndar úshin ekpe alý mańyzdy. Densaýlyq saqtaý mınıstrliginiń málimeti boıynsha 8-14 qarasha

aralyǵynda elimizge Pfizer vaktsınasy jetkizilmekshi.

Qazaqstanǵa 2 mln adamdy egýge eseptelgen 4 mln-daı doza preparat ákelinbekshi. Birinshi kezekte Pfizer vaktsınasymen júkti áıelder men 12-18 jas aralyǵyndaǵy balalardy egý josparlanýda. Balalardy vaktsınatsııalaý ata-analardyń tańdaýy boıynsha erikti túrde júrgiziletin bolady», dedi G.Ábdirahmanova.

Onyń sózine qaraǵanda, pandemııa bastalǵannan beri indet juqtyrǵan 39 116 adamnyń 85 paıyzy (33 412) jazylyp shyqty. Barlyǵy 822, bıyl 653 naýqas koronavırýstan ońala almaı, qaıtys boldy.

Qazirgi kezde 511 naýqas ambýlatorlyq em alýda. Al 153 adam 871 tósektik 16 ınfektsııalyq statsıonarda jatyr.

Bulardyń 13-i jansaqtaý bólimshesinde, sonyń 12-si aýyr halde. Invazıvti emes jasandy tynys alý apparatyna 9 adam qosylǵan. Naýqastardyń 8-i júrek-qan tamyrlary aýrýlaryna, beseýi qant dıabetine shaldyqqan. Aýyr haldegilerdiń 66,7 paıyzy (8) – jasy alpystan asqandar.

Eske sala keteıik, budan buryn BQO-da karantın talabyn buzǵandarǵa 7 mln teńgege jýyq aıyppul salynǵanyn jazǵan bolatynbyz.