BQO-da koronavırýspen kúreske tartylǵan medqyzmetkerlerge 5,7 mlrd teńge ústemeaqy tólendi

ORAL. QazAqparat - Batys Qazaqstan oblysynda koronavırýspen kúres sharalaryna tartylǵan densaýlyq saqtaý nysandarynyń 17 357 qyzmetkerine 5,7 mlrd teńge tólendi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ BQO boıynsha fılıalynyń dırektory Nurjamal Jumaǵulovanyń óńirlik kommýnıkatsııalar qyzmeti alańynda ótken brıfıngide málim etkenindeı, bıylǵy segiz aıda koronavırýs juqtyrǵan 10 845 naýqas 6,7 mlrd teńgege em aldy.

Barlyǵy 114 880 PTR-dıagnostıkaǵa 930,6 mln, sondaı-aq mobıldi brıgadalardyń 59 397 ret shyqqany úshin 341,5 mln teńge jumsaldy.

Nurjamal Shamǵonqyzynyń sózine qaraǵanda, osy kezeńde joǵarǵy jáne tómengi tynys joldarynyń jiti respıratorlyq ınfektsııalary, pnevmonııa, aýrýhanadan tys pnevmonııa jáne kovıdten emdeý úshin 21 893 naýqas 78,9 mln teńgeniń dárilik zattarymen qamtamasyz etildi. Sonyń ishinde 13 988 balaǵa 18, 6 mln teńgeniń dárilik zattary berildi.

Koronavırýstan emdeýge ambýlatorııalyq-dárilik qamtýǵa arnalǵan 5 preparat engizildi. Sol preparattarmen 7 809 patsıent 67,5 mln teńgege qamtamasyz etildi.

«Segiz aı ishinde statsıonarlarda mamandandyrylǵan medıtsınalyq kómek te berildi. Josparly túrde 23 328 patsıent 3,6 mlrd teńgege emdeldi. Sonymen qatar 1,39 mlrd teńgege 5 843 ota jasaldy. Osy merzimde 140 015 patsıent 4,4 mlrd teńgeniń dárilik zattarymen qamtyldy», dedi N.Jumaǵulova.

Eske sala keteıik, budan buryn BQO-da koronavırýs juqtyrǵandar sany sońǵy aptada 22,09 paıyzǵa tómendegenin jazǵan bolatynbyz.