BQO-da koronavırýspen aýyrǵan 700-den astam naýqas karantın talabyn buzǵan

ORAL. QazAqparat – Batys Qazaqstan oblysynda jyl basynan beri «Ashyq» qosymshasy derekteri boıynsha úılerinde oqshaýlanýy tıis 729 adamnyń karantın talabyn buzǵany anyqtaldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngide málim etkenindeı, olardyń 719-y – «qyzyl» mártebesi bar, ıaǵnı koronavırýs juqtyrǵan adamdar. Qalǵan ony – aýrýlarmen qarym-qatynasta bolǵandar.

Onyń aıtýynsha, derekterge sáıkes QR Ákimshilik quqyqbuzýshylyq kodeksi 425-baby 1-bóligine sáıkes jeke tulǵalarǵa 54 hattama toltyrylyp, 2 mln 481 myńnan astam teńge kóleminde aıyppul salyndy.

Jyl basynan beri 9047 adamnyń indet juqtyrǵany anyqtalsa, sonyń 4774-i – aýrý belgisi barlar, 4273-i – sımptomy joqtar. 1 aqpannan bastap 1949 naýqas tirkeldi.

«Kúni búgin oblysta 51 694 adam (37,1 paıyz) revaktsınatsııadan ótse, sonyń 947-si keshe egildi. Mamandar revaktsınatsııa máseleleri boıynsha turǵyndar arasynda túsindirý jumystaryn júrgizýde. 1 aqpannan beri memlekettik shekaradan anyqtamasyz ótken 300 jolaýshynyń beseýinen, halyqaralyq júk tasymalymen aınalysatyn 220 júrgizýshiniń 13-inen indet tabyldy», dedi M.Aryspaev.

Eske sala keteıik, budan buryn BQO-da ınfektsııalyq statsıonarlar 39,4 paıyzǵa tolǵanyn jazǵan bolatynbyz.