BQO-da kolledjder stýdentteri úshin 3 jataqhana salynady

ORAL. QazAqparat - «Prezıdenttiń bes áleýmettik tapsyrmasy» aıasynda oblystaǵy kolledjder stýdentteri úshin úsh jataqhana salynady. Bul týraly búgin óńirlik kommýnıkatsııalar qyzmetindegi brıfıngte BQO bilim basqarmasynyń basshysy Sholpan Qadyrova málim etti, dep habarlaıdy QazAqparat tilshisi.

Onyń aıtýynsha, Batys Qazaqstan ındýstrıaldyq kolledjinde 300, Oral polıtehnıkalyq kolledjinde 150 jáne Aqsaı tehnıkalyq kolledjinde 150 oryndyq jataqhana boı kótermekshi.

Bul ǵımarattardyń jobalyq-smetalyq qujattamasyn jasaýǵa oblystyq bıýdjetten qarjy bólindi.

Jalpy, oblysta tehnıkalyq jáne kásiptik bilim berý júıesinde 38 oqý orny bolsa, sonyń 27-si - memlekettik, 11-i - memlekettik emes kolledjder. Olarda 19050 shákirt bilim alsa, sonyń 10678-i nemese 56 paıyzy memlekettik tapsyrys boıynsha oqıdy.

Oblysta úsh aýysymdyq oqý men apattyq mektepterdi joıý maqsatynda 2017-2018 oqý jylynda aýdandardy aıtpaǵanda, Oral qalasynyń ózinde 1500 oryndyq úsh mektep paıdalanýǵa berildi.

Qazirgi tańda alty birdeı bilim nysanynyń qurylysy júrgizilýde. Atap aıtqanda, Oraldaǵy Zachagan kentiniń «Sarytaý» shaǵynaýdanynda 900 oryndyq, Zelenov aýdany Darııan aýylynda 100 oryndyq ınternatymen 300 oryndyq mektep, Terektiniń  Saryómirinde 48 oryndyq saýyqtyrý lageri, Bókeı ordasynyń ortalyǵy Saıqynda 70 oryndyq ınternat salynýda. Oǵan qosa shetel ınvestıtsııasy esebinen Aqjaıyq aýdany Shabdarjap aýylynda 198 oryndyq mektep, Aqsaı qalasynda 240 oryndyq balabaqsha da bıyl qoldanysqa beriledi.

«Degenmen oblys ortalyǵyna halyqtyń kóship kelýine baılanysty Oral qalasynda 5 mektep úsh aýysymda jumys jasaýda. Oǵan qosa oblys boıynsha tórt mektep apatty dep tanylyp otyr. Bul bilim nysandarynyń jobalyq-smetalyq qujattamasy jasalýda. Ótken jyly 1147,4 mln teńgege 17 bilim nysany kúrdeli jóndelgen bolatyn. Bıyl jergilikti bıýdjet esebinen Oraldaǵy №19 mektepti kúrdeli jóndeýge 200,4 mln teńge, №24 balabaqsha ǵımaratyna 216 mln teńge qaraldy. Kúni búgin merdiger anyqtaldy, jóndeýdi sáýir aıynda bastaý kózdelýde. Sonymen qatar jóndeýdi qajet etetin, jalpy quny 3144,6 mln teńge bolatyn 14 bilim berý mekemesiniń jobalaý-smetalyq qujattamasy daıyn, qarajat qarastyrylýda», - dedi Sholpan Qadyrova.