BQO-da kóktemgi sý tasqynynan zardap shekken otbasylarǵa jańa úıler berildi
Bıyl oblystyń birqatar aýdanynda turǵyn úılerdiń sýǵa ketkeni belgili. Sonyń ishinde Bórli aýdany turǵyndary zardap shekti. Arnaıy qurylǵan komıssııa 4 aýylda 16 úıdi turýǵa jaramsyz dep tapty. Bılik tarapynan jańa úılerdi salqyn túskenshe tapsyrý mindeti qoıyldy. Aqbulaq aýylynda qurylys jumystary mamyr aıynda bastalyp, sátimen bitti.
Baspanaly bolǵandardy quttyqtaǵan oblys ákimi Narıman Tóreǵalıev Memleket basshysynyń kez kelgen tótenshe jaǵdaı kezinde zardap shekkenderge ýaqtyly kómek kórsetýge erekshe mán berip otyrǵanyn atap ótti.
«Birlik pen yntymaqtyń arqasynda sý tasqynynyń zardaptaryn tezirek joıý baǵytynda sharalar ýaqtyly atqaryldy. Qıyn jaǵdaıǵa qaramastan, tózimdilik tanyta bilgen turǵyndarǵa alǵysymdy aıtamyn. Úıler qysqa merzimde ári sapaly salyndy. Bul, árıne, qýantady. Jańa turǵyn úı ıelerin shyn júrekten quttyqtaımyn. Ár shańyraqta molshylyq pen baqyt saltanat qursyn», - dedi ol.
Aýdany 80 sharshy metrden asatyn úıler bir yńǵaıda boı kóterdi, oǵan qosa 8 sotyq jer ýchaskesi bar.
«Sý tez ketkenimen, jaramsyz úıden ketýge týra keldi. Ońaı bolǵan joq. Qıyn kezde qolushyn sozǵan ákimdikke rızashylyǵymdy bildiremin. Jańa úı keń de turýǵa qolaıly», - dedi baspanaly bolǵandardyń biri Nurbergen Májenov.
Aıta keteıik, aldaǵy aıdyń ortasyna taman Bórli aýdanynyń 3 aýylynda taǵy 10 úı salynyp bitedi.
Bórli aýdany ákimdiginen alynǵan málimetke qaraǵanda, 175 ótinish boıynsha múlikter baǵalanyp, qorytyndy shyǵaryldy. Sondaı-aq, «Amanat» partııasy «Aqjaıyq» qory arqyly zardap shekken 93 adamǵa 41 mln teńge bólse, al «Qyzyl jarty aı» qoǵamy 177 otbasyna 96 mln teńgeniń járdemin berdi. Sonymen qatar, aýdan ákimdigi tarapynan 31 mln teńge kóleminde bir jolǵy áleýmettik kómek berildi.