BQO-da kóktemgi sý tasqynyna qarsy daıyndyq qyzý júrip jatyr
Oblys ákimi Narıman Tóreǵalıev aldaǵy sý tasqyny kezeńi Memleket basshysynyń tikeleı baqylaýynda ekenin atap ótti. Osy rette, sý basý qaýpi bar aýmaqtarda tasqynnyń aldyn-alý jumystary qyzý júrip jatyr.
Óńirdegi Jaıyq ózeniniń boıy bekitilip, sý basý qaýpi bar aýmaqtarǵa 102 shaqyrymdy quraıtyn 54 qorǵanys bógetteri turǵyzylǵan. Resýrstar boıynsha: 1 817 birlik tehnıka, 4 myńnan astam jumyldyrylady.
Aıta keterligi, oblysta kóktemgi sý tasqyny kezeńine daıyndyq jumystary jaz aılarynda bastalǵan bolatyn. Mamandar qaýipti aımaqtardy zerdelep, nátıjesinde aldyn alý jumystaryn júrgizý boıynsha arnaıy Jol kartasy ázirlengen.
Kazgıdromet mamandarynyń boljaýynsha, bıylǵy jyly da sý tasqyny qaýpi bar.
– 2025 jyldyń qańtar aıynda ótken jyldyń osy kezeńimen salystyrǵanda birdeı mólsherde jaýyn-shashyn jaýdy. Osynyń nátıjesinde Tasqala, Syrym, Bórli, Terekti, Báıterek jáne Oral qalasynda jerdiń betinde 2 sm qalyńdyqta muz jabyndysy paıda boldy. Aýa raıy kúrt jylyp, jańbyr mol jaýatyn bolsa, naýryz aıynda bul muz jabyndysy sý tasqynyna ákelýi múmkin», - dedi «Qazgıdromet» RMK BQO fılıaly dırektory T.Shapanov.
Batys Qazaqstan oblysynyń ákimi Narıman Tóreǵalıev sý qoımalary men toǵandardyń jaǵdaıyn baqylaý, tasqyn sýdy ótkizýdi qamtamasyz etetin arnalardy, kanaldardy, aryqtardy tazalaýdy, sonymen qatar sý tasqynyn joıýǵa arnalǵan kúsh pen quraldardyń, qorǵanys bógetteriniń daıyndyǵyn qamtamasyz etýdi tapsyrdy.
– Kóktemge barynsha daıyn bolý kerekpiz. Sý tasqynynyń aldyn alý sharalaryn sapaly júrgizýimiz mańyzdy. Qala, aýdan ákimderi jáne tıisti mekemelerdiń osy jumystardy kúsheıtýin tapsyramyn, - dedi oblys ákimi Narıman Tóreǵalıev.