BQO-da qoǵamdyq kómekshilerdiń járdemimen 56 qylmys ashyldy
Bul týraly BQO polıtsııa departamentinde jergilikti polıtsııa qyzmeti basqarmasy qyzmetkerleriniń qoǵamdyq kómekshilermen, volonterlik uıym ókilderimen kezdesýinde aıtyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen Asylaı Talǵatqyzynyń málim etkenindeı, 2004 jylǵy 9 shildedegi «Azamattardyń qoǵamdyq tártipti qamtamasyz etýge qatysýy týraly» QR Zańy jáne QR Іshki ister mınıstriniń 2004 jylǵy 27 qarashadaǵy «Azamattardy qoǵamdyq tártipti qamtamasyz etý boıynsha is-sharalarǵa tartý erejesin bekitý týraly» buıryǵyna sáıkes oblys aýmaǵynda quramynda 2 312 azamattan turatyn 235 qoǵamdyq quqyq qorǵaý qurylymdary qurylǵan bolatyn.
Azamattardyń qoǵamdyq tártipti saqtaýdy qamtamasyz etýge qatysýy olardyń ishki ister organdaryna kómek kórsetýi arqyly júzege asyrylady.
Qazaqstan Respýblıkasy Prezıdenti 2020 jyldy «Volonterler jyly» dep jarııalaǵannan bastap BQO PD jergilikti polıtsııa qyzmeti ár túrli sharalar ótkizý kezinde erikti volonterlerdi tartyp keledi.
Qazirgi tańda «Oral stýdentter alıansy», respýblıkalyq «Assambleıa jastary» qoǵamdyq birlestigi, «AMANAT» partııasy janyndaǵy «Jastar rýhy», «Aqjaıyq jastary», «Oral jastary», «Batys qamqor», «Oral qalasynyń stýdentter alıansy» korporatıvtik qory, «Qadam» eko jobasy sekildi volonterler uıymdary polıtsııa departamentiniń qolushyn sozyp, árdaıym járdemdesýge daıyn turady.
Atalǵan qoǵamdyq kómekshiler men volonterlar uıymynyń kómegimen kóptegen jumystar atqarylýda. Mysaly: «Túngi qaladaǵy balalar», «Qaýipsiz mektep» jedel aldyn alý is-sharalary barysynda kámeletke tolmaǵandar arasyndaǵy quqyq buzýshylyqty anyqtaý barysynda «Oral jastar», «Oral qalasynyń stýdentter alıansy» korporatıvtik qorymen, «Aqjaıyq jastary» eriktilerimen birge reıdtik is-sharalar júrgizilýde.
Batys Qazaqstan oblysy polıtsııa departamentiniń jergilikti polıtsııa qyzmeti BQO jastar saıasaty máseleleri boıynsha basqarmasymen, «Jaıyq tańy» úkimettik emes uıymymen jáne volonterlermen birge Oral qalasy men oblys aýmaǵynda ornalasqan turmystyq jaǵdaıy tómen 250-den astam otbasy tekserildi. Tekserý barysynda volonterlik toptar qıyn jaǵdaıǵa tap bolǵan balalarǵa kómek kórsetip, sporttyq, shyǵarmashylyq úıirmelerge tirkedi. Al esepte turǵan ata-analar ár túrli mamandar keńesin tyńdady. Sonymen qatar bilim berý uıymdarynda kámeletke tolmaǵandardyń jynystyq qol suǵylmaýshylyǵynyń aldyn alý máseleleri boıynsha ótkizilgen ata-analar jınalysynda QR QK 122, 188, 190-baptary boıynsha túsindirme jumystaryn júrgizdi, qylmystyń aldyn alý baǵynda úlestirme paraqshalary taratyldy. Jınalys barysynda JPQB ıývenaldy polıtsııa qyzmetkerleri kámeletke tolmaǵandardyń 137 zańdy ókiline quqyqtyq kómek pen keńester berdi. Jalpy, barlyq oqý oryndaryna BQO PD JPQB ıÝPb qyzmetkerleri «Jaıyq jastary» ÚEM men «Oral jastary» volonterlerimen birlesip, 300-ge jýyq aqparattyq-quqyqtyq jadynamany daıyndady.
-Biz polıtsııa qyzmetkerlerimen birge kóptegen is-sharalar atqaryp, qaıyrymdylyq kómek te kórsetip kelemiz. Jalpy, adamdarǵa qolushyn sozý ózime unaıdy. Men polıtsııamen eki jyldan beri birgemin. Osy kezeń ishinde 50 mektep, 18 kolledj, 3 ýnıversıtette esirtki qylmysynyń aldyn alý, jasóspirimderge qarsy qylmystar men quqyq buzýshylyqtardyń aldyn alý, olardy mádenı-sporttyq is-sharalarǵa tartý baǵytynda semınar-keńester uıymdastyrdyq, - deıdi volonter Ásel Myrzahmetova.
«Jyl basynan beri qoǵamdyq tártipti saqtaýda belsendik kórsetkeni úshin jáne qoǵamdyq qaýipsizdikti qamtamasyz etkeni úshin qoǵamdyq qurylymdardyń 149 múshesi yntalandyryldy.
Bul kezdesýdiń maqsaty eriktiler quramyndaǵy azamattardy qoǵamdyq kómekshiler qataryna shaqyrý bolatyn. Aldaǵy ýaqytta da qoǵamdyq tártipti saqtaýda belsendilik kórsetken jáne qoǵamdyq qaýipsizdikti qamtamasyz etken jandardy zańǵa sáıkes madaqtamamen, alǵyshattarmen, sondaı-aq aqshalaı syıaqymen marapattaý kózdelip otyr. Eriktiler uıymymen birge jasalatyn jumystar odan ári jalǵasatyn bolady», dep habarlady vedomstvodan.