BQO-da qyzylsha juqtyrǵan 56 adam statsıonarda emdelip jatyr
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, oblysta epıdemıologııalyq ahýal qolaısyz bolyp otyr.
Onyń sózine qaraǵanda, qyzylshamen aýyrǵandardyń 65,7 paıyzy (202) – 14 jasqa deıingi balalar, 8,4 paıyzy (26) – jasóspirimder, 25,7 paıyzy (79) – eresek adamdar.
«Aýrýlardyń basym bóligi (207-si) Oral qalasynyń úlesine tıedi. Sondaı-aq Bórli aýdanynda – 40, Syrymda – 21, Báıterekte – 13, Aqjaıyqta – 8, Kaztalov pen Terektide – bes-besten, Tasqalada – 3, Shyńǵyrlaýda – 2, Jańaqala men Qaratóbede 1 adamnan syrqattanǵany tirkeldi. Bulardyń 81,4 paıyzy ekpe almasa, sonyń ishinde 10,4 paıyzy – ekpe jasyna jetpegender, 24,4 paıyzy – egý týraly málimeti joqtar, 29,3 paıyzy – ekpeden bas tartqandar, 17,2 paıyzy – medıtsınalyq qarsy kórsetilimder sebebinen ekpe almaǵandar», - dedi N.Mustaev.
Departament málimeti boıynsha ujymdar arasynda ınkýbatsııalyq kezeńde turǵan oshaqtar sany 29 bolsa, sonyń 12-si – balabaqshalar, 16-sy – mektepter, bireýi – joǵary oqý orny (3 stýdent).
BQO densaýlyq saqtaý basqarmasy basshysynyń orynbasary Aınash Ǵubaıdýllınanyń aıtýynsha, qazirgi tańda statsıonarlarda 56 naýqas em alyp jatsa, sonyń 36-sy – balalar, 17-si – eresek adamdar, úsheýi – júkti áıelder. Bir balanyń jaǵdaıy aýyr bolsa, qalǵandarynyń hali ortasha.
«Qyzylshanyń aldyn alýdyń eń tıimdi joly – halyqty vaktsınatsııalaý. Barlyq balalar qyzylshaǵa qarsy ekpe alýy kerek. Qosymsha jappaı ımmýndaý bastalǵannan beri 2 583 bala egildi. Bıylǵy 9 qarashadaǵy málimet boıynsha qyzylshaǵa qarsy profılaktıkalyq ekpeden bas tartqandar sany 4 676 bolsa, túsindirý jumystarynyń nátıjesinde 1 101-ge azaıyp, 3 575 bala qalyp otyr. Bul baǵyttaǵy jumystar jalǵasýda», - dedi A.Ǵubaıdýllına.
Eske sala keteıik, budan buryn Batys Qazaqstanda qyzylshamen aýyrǵandar sany kóbeıip otyrǵanyn jazǵan bolatynbyz.