BQO-da keıbir ónimderdiń talapqa saı emestigi anyqtaldy
BQO qoǵamdyq densaýlyq saqtaý departamentinen túsken málimetke qaraǵanda, ónimderdiń qaýipsizdigine monıtorıng júrgizý aıasynda 120 ónim (taýar) synamaǵa satyp alynǵan.
«Ulttyq saraptama ortalyǵy» oblystyq fılıalynda ótkizilgen zerthanalyq tekserý nátıjesinde on tamaq óniminiń markasy memlekettik tilde kórsetilmegeni anyqtaldy.
Sonymen qatar Báıterek aýdany ortalyǵy Peremetnyı aýylyndaǵy «Dastarhan» («Gýseınov M» JK), «Albına» («Sısenǵalıeva A» JK) dúkenderinde saqtaý merzimderi ótip ketken tamaq ónimderiniń turǵany belgili boldy.
Sondaı-aq saraptama qorytyndysy nátıjesinde Qytaıdan shyǵarylǵan bes balalar oıynshyǵy talapqa saı bolmaı shyqty (aqparat, taýardyń ataýy, shyǵarylǵan jeri, merzimi memlekettik tilde kórsetilmegen). Qytaılyq «Interesting Toys Intelligence» shyǵarǵan oıynshyqta (syldyrmaq) da sáıkessizdik anyqtaldy.
«Atalǵan derekter boıynsha óndirýshilerge qatysty Qazaqstan zańnamasyna sáıkes tıisti sharalar alynýda», dep habarlady QazAqparat tilshisine qoǵamdyq densaýlyq saqtaý departamentinen.
Eske sala keteıik, budan buryn BQO-da tamaq ónimderinen qaýipti mıkrobtar tabylǵanyn jazǵan bolatynbyz.