BQO-da «Qaıyrymdylyq kerýeni» jol tartty
Sharaǵa qatysqan oblys ákimi Altaı Kólginovtiń aıtýynsha, bıyl óńirde muqtaj jandarǵa kóp bolyp qolushyn sozý maqsatynda «Meıirimdi kóktem» jobasy qolǵa alynǵan bolatyn. Osy shara aıasynda búgin Oral qalasyndaǵy áleýmettik kirisi az 400 otbasyna azyq-túlik sebeti taratyldy. Sonymen qatar «Arba» qoǵamdyq birlestigine alty múgedek arbasy berildi. Osyǵan oraı «Zvezda» meıramhanasynda qaıyrymdylyq baly uıymdastyrylyp, oǵan 200-den astam adam qatysty. Kásipkerler men mekeme-uıymdar basshylary, máslıhat depýtattary men memlekettik qyzmetkerler, qala turǵyndary arasynda taratylǵan bıletten (quny 20 myń teńgeden) túsken qarjy osylaısha qaıyrymdylyq maqsatyna jumsalýda.
BQO Azamattyq alıansynyń tóraıymy Aıgúl Túrkınanyń sózine qaraǵanda, aldaǵy ýaqytta múmkindigi shekteýli jandar úshin Almaty qalasynan tapsyryspen taǵy da on arba jetkiziletin bolady.
«Bıyl oblys ákiminiń turǵyndarmen eseptik kezdesýinde múmkindigi shekteýli jandarǵa, sonyń ishinde balalarǵa qoldaý kórsetý maqsatynda birneshe usynys jasaǵan edik. Osyǵan oraı óńir basshysy men Qazaqstan halqy BQO assambleıasy bizdi qoldady. «Meıirimdi kóktem» jobasy aıasynda úsh aı boıy qaıyrymdylyq sharalary uıymdastyrylmaqshy. Sondaı-aq túrli mekeme-uıymdar ǵımarattarynyń kireberisinde pandýstar ornatý máselesi de birtindep sheshilýde», dedi «Arba» qoǵamdyq birlestiginiń tóraıymy Gúlmıra Batpaqulova.
Aıta keteıik, osyndaı qaıyrymdylyq sharalary oblys aýdandarynda da qolǵa alynýda.