BQO-da kásiporyn 170 mln teńgege salyq tóleýden jaltarǵan

NUR-SULTAN. QazAqparat - Oral qalasynda «ZapadStroıKazahstan» kásiporny 170 mıllıon teńgege salyq tóleýden jaltarǵan. Bul týraly QR Qarjylyq monıtorıng agenttiginen málim etti, dep habarlaıdy QazAqparat.

«Jyl saıyn memleket qarajatty qylmystyq jolmen qolma-qol aqshaǵa aınaldyrýǵa qarsy kúreske baǵyttalǵan jańa sharalar qabyldaýda.

Bul rette, kúrestiń negizgi quraly retinde qylmystyq jaýapkershilik bolyp qalýda.

Іs júzinde jumystar oryndalmaı, qyzmetter kórsetilmeı, taýarlar tıep-jóneltilmeı shot-faktýralardy jazyp berý boıynsha is-áreketter jasaǵany úshin 7 jylǵa bas bostandyǵynan aıyrý túrindegi eń joǵarǵy jaza kózdelgen», - dedi agenttikten.

Málim etilgendeı, agenttiktiń Shyǵys Qazaqstan oblysy boıynsha aýmaqtyq departamentiniń qyzmetkerleri «ZapadStroıKazahstan» JShS dırektorynyń jalǵan shot-faktýralardy jazyp berý boıynsha zańsyz áreketteriniń jolyn kesti.

«Azamat O. Bessonov óz kásiporny atynan topyraq jetkizýge jáne qurylys jumystaryna «Oral qalasynda 1500 oryndyq tergeý ızolıatorynyń qurylysy» boıynsha merdiger bolyp tabylatyn «Býra Stroı» JShS-men jalǵan mámileler jasaǵan.

Sonymen qatar, sharttar boıynsha naqty qurylys jumystary júrgizilmegen.

Memleketke bıýdjetke tólenbegen salyqtar túrinde 170 mln teńgege zalal keltirildi.

O. Bessonov 1,5 jylǵa bas bostandyǵyn shekteý jazasyna tartyldy», - delingen taratylǵan habarlamada.