BQO-da kásipkerlikti qoldaý kartasy aıasynda 6,9 mlrd teńgege alty jobany júzege asyrý kózdelýde
Oblystyq kásipkerlik jáne ındýstrııalyq-ınnovatsııalyq damý basqarmasynan túsken málimetke qaraǵanda, sonyń nátıjesinde 558 jumys orny (munyń 416-sy - turaqty) ashylmaqshy. Atap aıtqanda, elektr qalqandy jabdyq óndirisi («ÝralElektrık» JShS), Makarov kirpish zaýyty, asfaltbeton zaýyty («Birlik» JShS), qurǵaq tańǵy as óndirý tsehy («Kazkon» kondıter fabrıkasy), jylyna 6 myń tonna et óndiretin qus fabrıkasy («Jaıyq Agro LTD» JShS) jáne makaron fabrıkasyn («Jelaev nan ónimderi kombınaty» AQ) salý josparlanǵan bolatyn. Qazirgi tańda sonyń ekeýi (elektr qalqandy jabdyq óndirisi men Makarov kirpish zaýyty) iske qosyldy.
Budan basqa kartadan tys 9,1 mlrd teńgege taǵy alty joba (550 jumys orny) júzege asyrylýda. Olar: tereze-esik óndirisi («StekloServıs» JShS), sendvıch-panelder óndirisi («Agran» JShS), asfalt zaýyty («AdalArna» JShS), aıaqkıim fabrıkasy («Asar» JShS), kólik-logıstıkalyq ortalyǵy («Eýrazıan Logıstık» JShS) jáne mal ónimin qaıta óńdeý tsehy («Kýbleı» JShS).
Sonymen qatar 2018-2019 jyldary 3,7 mlrd teńgege 4 jobany (491 jumys orny, 213-i turaqty) júzege asyrý oılastyrylýda. Bular: keramıkalyq kirpish óndirý zaýyty («134» JShS), hımııalyq óndiristik baza («Topan» JShS), mıneraldyq untaq, suıyq natrıı áınegi jáne kóbikáınek óndiretin zaýyt («Foamsil» JShS), shaǵyn katerler óndirisin keńeıtý jáne jańartý («Gıdroprıbor» ǴZI» AQ).
Atalmysh basqarma basshysynyń orynbasary Baqdáýlet Ibraımovtyń aıtýynsha, oǵan qosa «Aýyl sharýashylyǵyn qarjylaı qoldaý qory» AQ-nyń qatysýymen agroónerkásip kesheni jobalaryn qarjylandyrý isi jalǵasady. Bul maqsatqa oblystyq bıýdjet pen «Aýyl sharýashylyǵyn qarjylaý qoldaý qory» AQ-dan 300 mln teńge, sondaı-aq ekinshi deńgeıli bankter arqyly qosymsha qarjylandyrý úshin «Damý» kásipkerlikti damytý qory» AQ arqyly 700 mln teńge bólinedi.
Memlekettik-jekeshelik áriptestik boıynsha segiz joba qolǵa alynsa, sonyń ishinde 4 balabaqsha, 1 dene shynyqtyrý-saýyqtyrý kesheni salynyp, Oraldaǵy №7 emhana men №8 orta mekteptiń ashanasy senimgerlik basqarýǵa berilmekshi.
Aıta keteıik, oblysta 48 myń kásipkerlik nysany tirkelse, sonyń 37800-i naqty qyzmet jasaıdy. Olar bıylǵy birinshi jartyjyldyqta 312 mlrd teńge ónim óndirdi.
«Bıznestiń jol kartasy - 2020» baǵdarlamasy júzege asyryla bastaǵannan beri kásipkerlerdiń 85,6 mlrd teńgeni quraıtyn 713 jobasy memlekettik qoldaý sharalarymen qamtyldy. Bıyl osy baǵdarlama aıasynda 1,6 mlrd teńge, sonyń ishinde nesıeler boıynsha paıyzdyq mólsherlemeni sýbsıdııalaýǵa 1,4 mlrd teńge, kepildik berýge 94 mln teńge, granttyq qarjylandyrýǵa 47 mln teńge qaraldy.
Jyl basynan beri óńirlik úılestirý keńesiniń 17 otyrysy ótkizilip, 9 mlrd astam teńgeni quraıtyn 79 joba maquldandy.
2017 jyly jas jáne óz isin jańa bastaǵan 19 kásipker 47 mln teńge kóleminde tegin grantqa qol jetkizse, sonyń ishinde 14 joba aýyldyq jerde qolǵa alynbaqshy.