BQO-da qaraýyndaǵylardan aqsha jınaǵan ákim tártiptik jazaǵa ilikti

ORAL. QazAqparat  - Batys Qazaqstan oblysynda qaraýyndaǵylardan aqsha jınaǵan aýyl ákiminiń tártiptik isi qaraldy, dep habarlaıdy QazAqparat tilshisi. 

BQO boıynsha ádep jónindegi keńes otyrysynda málim bolǵanyndaı, Zelenov aýdany Rýbejın aýylynyń ákimi Aıbar Jańabaev qaraýyndaǵy qyzmetkerlerdiń issapar qarajatynan 5 myń teńgeden jınap otyrǵan.

Tekseris kezinde anyqtalǵandaı, A.Jańabaev ákim bolyp taǵaıyndalǵan 2015 jylǵy jeltoqsannan bergi mezgilde 190 myń teńgedeı jınalǵan.

Sybaılas jemqorlyqqa qarsy is-qımyl Ulttyq bıýrosy BQO boıynsha departamentiniń usynysy negizinde tártiptik isi qaralǵan A.Jańabaev keńes otyrysynda qarjynyń ǵalamtor baılanysynyń aqysyn tóleýge, avtokólikti jóndetýge, qosalqy bólshekter alýǵa jınalǵandyǵyn aıtyp, kinásin moıyndady.

Ádep jónindegi keńes talqylaı kele, Aıbar Jumabaevqa memlekettik qyzmetke kir keltiretin buzýshylyq jasaǵany úshin qyzmetine tolyq sáıkes emestigi týraly tártiptik jaza qoldaný jóninde Zelenov aýdany ákimine usynys jasady.

Ádep jónindegi keńes otyrysynda sondaı-aq kóliktegi qoǵamdyq densaýlyq saqtaý departamenti Oral bólimshelik qoǵamdyq densaýlyq saqtaý basqarmasynyń basshysy Aıtqalı Batyrovtyń isi qaraldy.

Oral kólik prokýratýrasynyń málimetine qaraǵanda, qaladan qatynaıtyn poıyzdardy tekserý júıeli uıymdastyrylmaǵan. Onyń ústine, anyqtalǵan kemshilikter boıynsha tıisti qyzmetkerler jaýapqa tartylmaǵan. Mysaly, bıylǵy naýryz aıynda Oral-Almaty baǵytyndaǵy poıyzdy tekserý barysynda ishek qurty bakterııasyna baılanysty tórt derek belgili bolyp, sol boıynsha bir ǵana jolserik jaýapqa tartylǵan. Osy boıynsha keshendi tekserý júrgizilmeı, «Jolaýshylar tasymaly» AQ basshylyǵy jaýap berýden tys qalǵan. Sol sekildi Oral-Astana baǵytyndaǵy №196 poıyzda 44 vagon bolsa, sonyń bireýinen ǵana buzýshylyq tabylýy tańdanys týǵyzady.

Keńes otyrysynda A.Batyrov basqarma mamandary poıyzdy bir saǵat ishinde tekserýge úlgermeıtinin alǵa tartty.

Qaýipsizdik talaptaryn buzǵan tulǵalarǵa ákimshilik jaýapkershilikke tartý sharalaryn qoldanbaǵany úshin A.Batyrovqa qatań sógis berý usynyldy.

Eske sala keteıik, budan buryn qaraýyndaǵy qyzmetkerden para alǵan basshyny qyzmetinen bosatý usynylǵany jóninde jazǵan bolatynbyz.