BQO-da kánigi urylar maldy soıyp, bas-terisin tyǵyp tastap otyrǵan

<p>ORAL. KAZINFORM &ndash; Batys Qazaqstan oblysynda mal urlyǵymen aınalysqan kúdiktiler ustaldy.</p>

BQO Polıtsııa departamentiniń baspasóz qyzmetinen málim etkenindeı, Jánibek aýdanynyń eki turǵyny urlanǵan maldyń etin Oral qalasyna tasymaldaý kezinde qolǵa túsken.

Kólikti tekserý barysynda erkin jaıylymnan jymqyrylǵan eki iri qaranyń soıylǵan eti tabyldy.

Tergeý barysynda maldyń Jánibek aýdanynyń bir turǵynyna tıesili ekeni anyqtaldy.

Jedel izdestirý is-sharalary nátıjesinde kúdiktilerdiń biri osyǵan deıin aýdan aýmaǵynda taǵy úsh ret mal urlyǵyn jasaǵany belgili boldy. Olar urlanǵan maldy satyp, terilerin Aşyózek ózeniniń kópiriniń astyna tastaǵan. Sonymen qatar kúdiktilerdiń biri malshy bolyp jumys istep júrgen kezde qylmys jasaǵany anyqtaldy.

- Tergeý barysynda jaqyn mańnan urlanǵan maldyń kómilgen bas-terisi jáne basqa da bólikteri tabyldy. Sondaı-aq qylmys jasaýǵa paıdalanylǵan quraldar tárkilendi. Qazirgi ýaqytta mal urlyǵy boıynsha sotqa deıingi tergeý aıaqtalyp, is materıaldary sotqa protsessýaldyq sheshim qabyldaý úshin jiberildi, - dep habarlady vedomstvodan.

Eske sala keteıik, budan buryn jol-kólik oqıǵasyn jasaǵan BQO ákimdiginiń qyzmetkeri jumysynan bosatylǵanyn jazǵan bolatynbyz.