BQO-da gazdandyrý jumystaryna 3,7 mlrd. astam teńge bólinip otyr

ORAL. QazAqparat - Batys Qazaqstan oblysynda eldi mekenderdi gazdandyrýǵa 3,7 mlrd. astam teńge bólinip otyr. Bul týraly búgin Ortalyq kommýnıkatsııalar qyzmeti óńirlik fılıalynda oblys ákiminiń orynbasary Baǵdat Azbaev málim etti, dep habarlaıdy «QazAqparat» tilshisi.

Onyń aıtýynsha, sonyń ishinde Syrym, Qaratóbe, Shyńǵyrlaý aýdandaryn gazdandyrýǵa 750 mln. teńge qaraldy. Oǵan qosa bes aýdandaǵy 12,7 myń turǵyny, 106 áleýmettik nysany bar 34 eldi mekenge gaz qubyryn tartýǵa 2,6 mlrd. teńge jumsalmaq. Sonyń ishinde shalǵaıdaǵy Bókeı ordasy aýdanynyń 11 eldi mekenin gazdandyrýǵa 500 mln. teńge ketpek. Al 2,1 mlrd. teńge Oral jylý-qýat ortalyǵyna magıstraldy gaz qubyryn tartý jumystaryn jalǵastyrýǵa baǵyttaldy. Sondaı-aq Aqjaıyq, Jańaqala, Jánibek jáne Syrym aýdandaryndaǵy 23 eldi mekenge gaz qubyryn tartýǵa 420,7 mln. teńge berildi.

«Kúni búgin konkýrstar ótkizilip, merdigerler anyqtaldy», dedi B.Azbaev.

Aıta keteıik, qazirgi tańda oblys halqynyń 93,4 paıyzy tabıǵı gazben qamtylǵan, sonyń ishinde 593 myń halqy bar 275 aýyl gazdandyrylǵan. Jyl aıaǵynda atalmysh kórsetkish 94 paıyzǵa jetpekshi.