BQO-da gaz aýa qospasy jarylyp, eki adam kúıik jaraqatyn aldy

ORAL. QazAqparat – Batys Qazaqstan oblysynda gaz aýa qospasy jarylyp, eki adam kúıik jaraqatyn aldy, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkenindeı, oqıǵa 3 jeltoqsan kúni saǵat 20.15-te Kaztalov aýdany Taldyqudyq aýylynda boldy.

Jeke úıge «KAZGID» JShS gaz sharýashylyǵy qyzmetkerleri gaz peshin ornatyp jatqan kezde jarylys boldy.

Sonyń saldarynan qosymsha qurylystyń tóbesi qırap, tereze áınekteri byt-shyt boldy.

Gaz aýa qospasynyń jarylýynan Oral qalasynda turatyn 29 jastaǵy qyzmetker 25 paıyz, 28 jastaǵy jigit 15 paıyz kúıik jaraqatyn aldy. Olardyń ekeýi de jedel járdem kóligimen Jalpaqtal aýylyndaǵy aýrýhanaǵa jetkizildi.

Qazirgi kezde oqıǵanyń jaı-japsary anyqtalý ústinde.

Eske sala keteıik, budan buryn Oralda polıtsııa qyzmetkeri polıtsııa ǵımaratynda atylyp ólgenin jazǵan bolatynbyz.