BQO-da Elek ózenindegi sý deńgeıi qaýipti deńgeıden asyp ketti

<p>ORAL. KAZINFORM - Batys Qazaqstan oblysy Shyńǵyrlaý aýdanynda Elek ózenindegi sý deńgeıi qaýipti deńgeıden asyp ketti.</p>

«Qazgıdromet» RMK BQO fılıalynyń dırektory Tilegen Shapanovtyń málim etkenindeı, ózenniń sýy Shilik gıdrologııalyq beketinde bir táýlik ishinde 186 santımetrge kóterilip, 785 santımetrge (qaýipti deńgeı – 750 sm) jetti.

«Reseıdiń Orynbor oblysy jaǵynan sý kelip jatyr. Sý deńgeıi 800 santımetrden asqan jaǵdaıda aýdannyń ózen boıynda ornalasqan eldi mekenderine qaýip tónýi yqtımal», - dedi T.Shapanov.

«Qazgıdromet» RMK BQO fılıalynyń málimeti boıynsha Jaıyq ózenindegi sý deńgeıi bir táýlik ishinde Oral qalasy tusynda 84 santımetrge kóterilip, 457 santımetrge (qaýipti deńgeı – 850 sm) jetti.

Shaǵan ózeni Chývashın aýyly tusynda 1211 (qaýipti deńgeı – 1280-1300 sm), Derkól Beles mańynda 670 (600-650), Qaraózen Jalpaqtalda 756 (790-820) santımetrdi kórsetti.

Shyńǵyrlaý aýdanynyń ákimi Murat Ómirálıev jaǵdaıdyń baqylaýda ekendigin jetkizdi.

«Elek ózeniniń sýy ótip jatyr. Ázirge eldi mekenderge qaýip tónip turǵan joq», - dedi M.Ómirálıev.

Eske sala keteıik, budan buryn Oralda kardıologııalyq ortalyqta emdelip jatqan naýqastardyń kóshirilgenin jazǵan bolatynbyz.

Sondaı-aq Batys Qazaqstanda ólgen mal sany 1 myńnan asty.