BQO-da eki lıtseıge oqýshylardy konkýrs arqyly qabyldaýǵa qatysty daý týyndady
BQO bilim basqarmasynan túsken málimetke qaraǵanda, mamandandyrylǵan bilim berý uıymdaryna oqýshylardy konkýrstyq irikteý arqyly qabyldaý QR Bilim jáne ǵylym mınıstriniń 2018 jylǵy 12 qazandaǵy «Bastaýysh, negizgi orta jáne jalpy orta bilimniń jalpy bilim beretin oqý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik qaǵıdalaryn bekitý týraly» №564 buıryǵy negizinde júrgiziledi.
Konkýrstyq irikteý, uıymdastyrý jáne ótkizý jónindegi qyzmet QR Oqý-aǵartý mınıstrliginiń 2022 jylǵy 7 qarashadaǵy «QR OAM-niń 2021 jylǵy 9 sáýirdegi «Daryn» respýblıkalyq ǵylymı-praktıkalyq ortalyǵy» RMQK ótkizetin qyzmetterdiń baǵasyn bekitý týraly» №158 buıryǵyna ózgerister engizý týraly» №448 buıryǵyna jáne Qazaqstan Respýblıkasynyń 2015 jylǵy 4 jeltoqsandaǵy №434-V QRZ «Memlekettik satyp alý týraly» Zańyna sáıkes satyp alýdyń baǵa usynysyn suratý tásili arqyly júzege asyrylady.
Oqýshylardy konkýrstyq negizde qabyldaýdy uıymdastyrý, ótkizý, nátıjesin shyǵarý jumystary aqyly negizde júretindikten, atalmysh eki mektep tarapynan bıyl memlekettik satyp alý portalyna habarlandyrý ilinip, konkýrsty «Nedvıjımost Sıtı» JK (sońynan «Abyroı» bolyp ózgertildi) utyp alǵan.
Basqarmanyń málimetinshe, Oral qalasynyń A.Baıtursynov atyndaǵy №10 orta mektep bazasynda 8 maýsym kúni «Nedvıjımost Sıtı» JK ótkizgen emtıhannyń qorytyndysy mektepter tarapynan tehnıkalyq sıpattamaǵa jáne memlekettik satyp alý shartynyń talaptaryna sáıkes emes dep tanyldy. Osyǵan oraı emtıhannyń qorytyndysy zańdy turǵyda sheshimin tapqanǵa deıin 2024-2025 oqý jylyna oqýshylardy qabyldaý mektepter ákimshiliginiń sheshimimen ýaqytsha toqtatylǵan. Óıtkeni emtıhan qorytyndysynyń nátıjesin negizge ala otyryp, emtıhan tizimdemesin salystyrǵan kezde sáıkessizdik tabylyp, emtıhan ótkizý erejeleri buzylǵan kóptegen derekter anyqtalǵan.
BQO bilim basqarmasynyń basshysy Eldos Safýllınniń túsindirýinshe, 85 úmitker oqýshynyń jınaǵan ball sany jasandy jolmen kóterińki nemese tómendetilgeni emtıhan paraqtaryn tekserý nátıjesinde belgili boldy. Mysaly, 85 ball jınaǵan oqýshy kórsetkishin 138 dep burmalaǵan. 45 ball jınaǵan oqýshyny 155 ball dep kóterse, 173 ball jınaǵan oqýshy 127 ball dep tómendetilgen. Qujat tapsyrmaǵan 15 úmitker tizimde bolmaǵanyna qaramastan, emtıhannan ótken. Portaldaǵy qorytyndy nátıje tizimi 2024 jyldyń 10 maýsym kúni jarııalanyp, 13 maýsymǵa deıin 3 ret ózgertilgen. Jalpy tehnıkalyq sıpattama boıynsha 30-dan astam tarmaqtyń talaptary óreskel buzylǵan.
«Bul jerde ata-analardyń úsh tobynyń múddesi bar. Olardyń birinshisi emtıhan nátıjesi kúshinde qalyp, balalarynyń oqýǵa túskenin qalaıdy. Ekinshi top – balalary oqýǵa túse almaı qalǵandar. Olar emtıhan kezinde ádiletsizdik bolǵanyn alǵa tartady. Úshinshisi – shaqyrtylmaı, emtıhanǵa qatysa almaı qalǵandar. Tehnıkalyq saraptama talaptarynyń óreskel buzylýyna baılanysty mektep dırektorlary emtıhan qorytyndysyn qabyldap, jaýapkershilikti moınyna ala almaıdy», - deıdi E.Safýllın.
«Nedvıjımost Sıtı» JK basshysy Aıjan Álıevanyń aıtýynsha, emtıhan jumysy boıynsha uıymdastyrý jumystary bastalǵan sátten-aq qıyndyqtar týyndaǵan.
«Eki mektep basshysy Aıagóz Orynbaıqyzy men Jeńis Meńdiǵalıuly emtıhandy jeke kásipkerdiń ótkizýine qarsylyqtaryn tanytty. Jyl saıyn bul qabyldaý emtıhanynyń «Daryn» RǴPO ótkizip júrgendigin alǵa tartty. Eger basymdylyq tek «Daryn» RǴPO-ǵa berilse, nege memleket ashyq konkýrsqa salady? «Nedvıjımost Sıtı» JK memlekettik satyp alý talaptaryna saı tehnıkalyq sıpattamaǵa sáıkes jumysty ótkizý kerek boldy. Mektep, oblystyq bilim basqarmasy, oblystyq ákimdik tarapynan, «Darynnan» eshqandaı qoldaý bolmasa da, ótkizip shyqty», - deıdi A.Álıeva.
Onyń sózine qaraǵanda, eki mektepke de emtıhanǵa qatysatyn oqýshylardyń qujattaryn «Daryn» RǴPO aqpan-sáýir aralyǵynda jınap alǵan. Memlekettik satyp alýdyń sheshimi shyqpaı turyp, «Daryn» RǴPO ne sebepti, qandaı negizde oqýshylardyń qujattaryn jınap alady? Bul – birinshi zańbuzýshylyq. «Nedvıjımost Sıtı» JK №11 mektepke ata-analarǵa aqparat jetýi úshin mekteptiń áleýmettik jelisinde jarnamalyq banner jáne emtıhan uıymdastyrýshylarynyń portalyna siltemeni shyǵarýdy ótinedi. Biraq mektep qoldaý bildirmeıdi. Osylaısha, «Nedvıjımost Sıtı» JK ata-analar nomerin áreń jınaıdy.
«№564 buıryqta barlyq emtıhan ár oblys boıynsha bekitilgen tirek mektepte ótýi tıis. Biraq №34 mektepte emtıhandy ótkizýge ruqsat berilmedi. №30 mektepke kelisip, sonda ótkizeıin dep jatqan kezde qalalyq bilim bóliminiń aralasýymen ol mektepte emtıhan ótkizýge taǵy ruqsat berilmedi. Sóıtip, emtıhannyń №10 mektepte ótilýi bir túnniń ishinde sheshildi. Bul da uıymdastyrýshylar úshin de, oqýshylar úshin de úlken stress. Sebebi, «Nedvıjımost Sıtı» JK úsh kún júrip, emtıhan bolatyn mektepti tehnıkalyq jaǵynan daıyndady, emtıhan kezinde vıdeotranslıatsııa jasaý úshin arnaıy kamera qondyrǵan bolatyn. Emtıhanǵa deıin qansha kedergi bolsa da, «Nedvıjımost Sıtı» JK emtıhandy ótkizdi. Talapqa saı emtıhan kezinen vıdeotranslıatsııa jasaldy, emtıhan kezinde ata-ana ony syrtta turyp kórdi. Oqýshylardyń bir-birinen kóshirdi, telefonnan kóshirdi degen aıyptaryna esh dálel joq. Tártip buzý faktisi bolsa, nege sol jerde komıssııa sony aıǵaqtap, akt toltyrmaıdy? Qorytyndysynda, «Abyroı» JK emtıhandy ótkizdi. Ata-ana, oqýshy taraby rıza. Komıssııa múshelerinen esh eskertý joq. Sondyqtan da, oryndalǵan ister boıynsha aktige mekteptiń qol qoımaýy orynsyz», - deıdi A.Álıeva.
Ata-analardyń biri Lýnara Orashaeva balalardy qaıtadan testiden ótkizbeı, emtıhan qorytyndysyn qabyldaý kerektigin málimdedi.
«Qyzymnyń emtıhannan súrinbeı ótýi úshin eki jyl boıy «Dostyq» bilim ortalyǵynda aıyna 43 myń teńge tólep, daıyndattym. Endi nelikten ekinshi ret synaq tapsyrýy tıis. Bul jerde balamyzdyń quqyǵy buzylyp tur dep esepteımin. Eger zańbuzýshylyq oryn alsa, oblystyq bilim basqarmasy on kúnnen keıin ata-analardy jınap, nege túsindirmegen? Biz hat tasyp, túrli mekemelerge júginýmen sharshadyq. Jańa oqý jylynyń bastalýyna kóp qalǵan joq. Sonda másele qashan sheshilmekshi?», - dedi L.Orashaeva.
S.Seıfýllın atyndaǵy №11 mektepke barlyǵy 470 oqýshy emtıhan tapsyrsa, sonyń 100-i ótken. ІT-lıtseıge 48 oqýshy alynady delingen.
«Oblystyq IT lıtseıge qujat tapsyrýdan bastap emtıhan ótkenge deıin bul máseleniń basy-qasynda bolǵan ata-ananyń biri men edim. Emtıhan ótip, qorytyndy shyqqanda, balamyzdyń eńbegi aqtaldy dep bir qýansaq, qorytyndyny mektep qabyldamaı qoıǵanda, aıdalada qalǵan sharasyz adamnyń kúıin keshtik. Qazir bala da, ata-ana da belgisiz jaǵdaıda otyrmyz. Mektepke qabyldaý emtıhanynyń qaıta ótkizilýine qarsy ata-analardyń qatarynanmyn. Maýsymda bastalyp órshigen iste mektep te, tender utyp, emtıhan ótkizgen kásipker de óz múddelerin qorǵap álek. Al bala she? Balanyń ne kinási bar? Bala emtıhanǵa keldi, aldyna usynǵan tapsyrmany bar erik-jigerimen, bilimimen oryndady, tapsyrdy, ketti. Sońynda qujattardyń durys-burystyǵyna, eresekterdiń "ózara" máselelerine nege bala jaýapty? Bilim alamyn dep maqsatty túrde eńbektenip kelgen balanyń saǵy syndy. Tenderdiń aqshasyn kim qalaı bólmek, onda esh sharýam joq, balamnyń quqyǵy taptalmasyn, oqýǵa qushtarlyǵy joıylmasyn men úshin. Sondyqtan 8 maýsym kúni ótken mektepke qabyldaý emtıhandarynyń qorytyndysy durys dep tanylyp, ótken oqýshylar tizimge sáıkes qabyldansyn. Ekinshiden, málimetteri emtıhan ótkizýshige mektep ne «Daryn» ortalyǵy (qabyldau.daryn.kz aldyn-ala jasaqtaldy) tarapynan berilmegen, demek, emtıhanǵa qatysa almaı qalǵan oqýshylarǵa múmkindik jasalyp, bólek emtıhan uıymdastyrylyp, taǵy synyptar jasaqtalsyn. Qujattardaǵy qatelikterge bala jaýapty emes, balanyń quqyǵy qorǵalýyn talap etemiz», - dedi Aınur Luqpanova.
Daryndy balalarǵa arnalǵan S.Seıfýllın atyndaǵy №11 oblystyq mamandandyrylǵan mektep-lıtseı-ınternatynyń dırektory Aıagóz Hamzına BQO aýdanaralyq ekonomıkalyq sotynyń sheshimi boıynsha «Abyroı» JK-nyń josyqsyz qatysýshy retinde tanylǵanyn jetkizdi.
«Olardyń bes jumys kúni ishinde shaǵymdanýǵa quqyǵy bar», - deıdi ol.
BQO daryndy balalarǵa arnalǵan mamandandyrylǵan aqparattyq tehnologııalar mektep-lıtseı-ınternaty dırektorynyń orynbasary Ańsaǵan Imanǵalıeva jryndalǵan jumystyń tehnıkalyq sıpattamasyndaǵy kemshilikterge baılanysty «Abyroı» JK-ny josyqsyz qatysýshy dep taný týraly sotqa júgingenin aıtady.
«Abyroı» JK-ny josyqsyz qatysýshy dep taný týraly sotqa júgindik. Qazirgi kezde bul is aýdanaralyq ekonomıkalyq sotta qaralýda. Sottyń sheshimi shyqqannan keıin bilim berý uıymyna oqýǵa úmitkerler irikteletin bolady», - dedi Ańsaǵan Imanǵalıeva.
BQO bala quqyqtary jónindegi ýákili Janat Nurmaǵambetova bul másele boıynsha arnaıy komıssııa qurý qajettigin aıtty.
«Ata-analardyń talabyn túsinemin. Bul jerde anyǵy – balalardyń quqyǵy buzylǵan. Eń bastysy, osyny eskere otyryp, ortaq sheshimge kelgenimiz jón. Talasyp, tartysa bergennen eshteńe ónbeıdi. Eger beınejazba arqyly ótken balalardyń ádil tapsyrǵany dáleldense, olar ekinshi ret synaq tapsyrmaýy kerek. Al ata-anasy qujat tapsyryp úlgermegender testiden ótsin. Qoryta aıtqanda, tolyq tekserip, kimnen kemshilik ketti, barlyǵyn anyqtaý úshin arnaıy komıssııa quryp, jumystanýymyz qajet», - dedi J.Nurmaǵambetova.
BQO bilim basqarmasynyń basshysy E.Safýllın ata-analardyń, bala quqyqtary jónindegi ýákildiń ýájin tyńdaı kele, komıssııa qurý týraly sheshimge kelgenin jetkizdi.
«Bilim sapasyn kóterý mańyzdy. Eger emtıhan qorytyndylary burmalanyp, tómen ball alǵandar ótip ketip jatsa, onda akademııalyq adaldyq ta bolmaıdy. Bilim salasyndaǵy ekinshi basty maqsat – bala quqyǵynyń qorǵalýy. Mınıstrimiz Ǵanı Beısembaevtyń mektepke kelgen birde-bir balanyń bir tal shashy jerge túspeýi kerektigi týraly tapsyrmasy bar. Osy turǵydan kelgende, balanyń quqyǵy alǵa shyǵaıyn dep tur. Ata-analardyń, bala quqyqtary jónindegi ýákildiń ýájin tyńdaı kele, komıssııa qurý týraly sheshimge keldik. Komıssııa máseleni tolyq zerdelegennen keıin naqty sheshim qabyldanady», - dedi E.Safýllın.