BQO-da «Dármek» is-sharasy barysynda 13 medıtsına qyzmetkeri jaýapqa tartyldy
Bes kún ishinde BQO PD esirtki qylmysyna qarsy kúres basqarmasynyń qyzmetkerleri 6 esirtki qylmysynyń jolyn kesti.
Sonyń ishinde asa iri kólemde esirtki zattaryn zańsyz saqtaýdyń 3, quramynda esirtki bar ósimdikterdi zańsyz ósirýdiń 2 jáne ósimdikter men esirtkiniń sıntetıkalyq túrlerin ótkizýdiń 1 deregi anyqtaldy.
«Sonymen qatar Qazaqstan Respýblıkasynyń zańnamasynda belgilengen esirtki quraldarymen, psıhotroptyq zattarmen jáne prekýrsorlarmen jumys isteý erejelerin buzý derekteri anyqtalǵan medıtsınalyq mekemeler men ónerkásip kásiporyndary tekserildi. Nátıjesinde 13 medıtsına qyzmetkeri jáne ónerkásiptik kásiporyndardyń 2 qyzmetkeri ákimshilik jaýapkershilikke tartyldy. Oǵan qosa 26 shilde kúni BQO PD esirtki qylmysyna qarsy kúres basqarmasynyń qyzmetkerleri Oral qalasy aýmaǵynda júrgizgen is-shara barysynda 40 jastaǵy shahar turǵynyn anyqtap, ustady. Onyń turǵylyqty jeri boıynsha tekserý barysynda 22 dana sur-jasyl tústi, erekshe ıisi bar zat salynǵan sirińke qoraptary tabylyp, tárkilendi. Sondaı-aq is-shara kezinde 36 jasar qala turǵynynyń ústi-basyn tekserý kezinde arnaıy spetsıfıkalyq ıisi bar sur-jasyl tústi zaty bar orama qaǵaz, úıdi tintý kezinde 41 dana 12 kalıbrli patrondar tárkilendi. Tárkilengen zattar sot-medıtsınalyq saraptamaǵa jiberildi. Ustalǵandarǵa qatysty QR QK-niń 296-babynyń 4-bóligine (asa iri mólsherdegi esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) sáıkes sotqa deıingi tergeý amaldary júrgizilip jatyr», dep habarlady vedomstvodan.