BQO-da dárigerler tikushaq apatynan zardap shekken eki adamnyń jaǵdaıy týraly aıtty
Oral qalalyq kópbeıindi aýrýhananyń qabyldaý bóliminiń meńgerýshisi Erkin Aqballınniń aıtýynsha, tikushaq apatynan keıin eki adam jedel járdem kóligimen keshe saǵat 19.45-te jetkizilgen.
«Aýrýhanaǵa kelip túskennen keıin neırohırýrg, hırýrg, reanımatolog, travmatologtardyń qatysýymen medıtsınalyq kómek kórsetildi. Basy, keýdesi rentgenge túsirilip, ish qurylysyna ýltradybystyq zertteý jasaldy. ıAǵnı barlyq tekserýlerden ótkizildi. Ekeýiniń de túskende sanasy anyq, jalpy jaǵdaıy ortasha boldy, barlyq suraqtarǵa jaýap berdi. Olar neırohırýrgııa bólimine jatqyzyldy. Ekeýi de jabyq bas-mı jaraqatyn alyp, mılary shaıqalǵan. Bireýiniń astyńǵy, ústińgi erinderi kógergen. Eshqandaı otanyń qajeti joq. Qazir em alyp jatyr, bes-alty kúndeı dárigerlerdiń baqylaýynda bolady», dedi E.Aqballın.
Zardap shekkenderdiń biri, «Qazavıaqutqarý» jetekshi ınjeneri Sergeı Şeglovtyń sózine qaraǵanda, qazir jaǵdaılary jaqsy. Tájirıbeli maman osy salada 1981 jyldan beri eńbek etedi eken.
«Buryn biz adamdardy qutqarsaq, bul joly bizdiń basymyzǵa sondaı kún týdy. Qutqarýshylarǵa, dárigerlerge, bárine alǵys aıtamyn. Men tikushaqtyń artynda otyrdym. Úsh saǵattaı ushty, bári jaqsy boldy. Tikushaqtyń shyǵarylǵanyna da kóp bolmaǵan, bar bolǵany 250 saǵat ushqan. Ne bolǵanyn bilmeı qaldyq», dedi S.Şeglov.
Eske sala keteıik, budan buryn BQO-da tikushaq apatynan zardap shekken eki adamnyń aýrýhanaǵa jatqyzylǵanyn jazǵan bolatynbyz.