BQO-da brýtsellezge shaldyqqan 4 300-den astam iri qara soıý oryndaryna tapsyryldy

<p>ORAL. KAZINFORM &ndash; Batys Qazaqstan oblysynda bıylǵy toǵyz aıda brýtsellezge 666,8 myń bas iri qara zerttelip, sonyń 4 942-si aýrý ekeni anyqtaldy.</p>

BQO veterınarııa basqarmasy basshysynyń orynbasary Nurqaıyr Qusaıynovtyń málim etkenindeı, sondaı-aq 1 mln 124,2 myń qoı-eshkiniń ishinen 1 203-i brýtsellezge shaldyqqany belgili boldy.

Onyń aıtýynsha, veterınarııalyq zańnama talaptaryna sáıkes 12 aıǵa tolǵannan keıin barlyq iri qara jáne usaq maldar kóktem men kúzde eki ret tekseriledi. 

«Brýtsellez tabylǵan maldar oblys aýmaǵyndaǵy 6 soıý uıymyna tapsyrylyp, soıylady. Kúni búginge deıin 4 316 bas iri qara jáne 991 qoı-eshki sanıtarlyq soıý oryndaryna tapsyryldy», deıdi N.Qusaıynov.

Onyń aıtýynsha, sońǵy jeti jyldaǵy aýyl sharýashylyǵy janýarlarynyń brýtsellezben aýrýy tómendep keledi. Mysaly, 2018 jyly – 9 431, 2019 jyly – 7 871, 2020 jyly – 6 862, 2021 jyly – 6 490, 2022 jyly – 5 045, 2023 jyly 4 141 bas brýtsellezge jatqyzylǵan. 

Bıyl brýtsellezge shaldyqqan 329 bas usaq maldyń et ónimderi úshin 5 mln 498,3 myń teńge ótemaqy tólengen. 

«QR Aýyl sharýashylyǵy mınıstrliginiń tapsyrmasyna sáıkes 2025 jyly Terekti aýdany Bekeı aýylynda 50 mln teńgege, 2026 jyly Bókeı ordasy men Terekti aýdanynda árqaısysyn 30 mln teńgege, barlyǵy úsh mal soıý ornyn salyp, iske qosý kózdelip otyr», - dedi N.Qusaıynov.

Eske sala keteıik, budan buryn Batys Qazaqstanda mal qorymdarynyń kópshiligi talapqa saı kelmeıtinin jazǵan bolatynbyz.