BQO-da boranda joǵalǵan 62 jastaǵy er adam ushaqpen de izdestirilip jatyr
BQO TJ departamentiniń baspasóz qyzmetinen málim etkenindeı, oqıǵa 22 qarasha kúni Terekti aýdany Aqjaıyq aýylynda boldy.
Saǵat 10.00-de 1961 jylǵy er adam jumystan shyǵyp ketkennen úıine oralmaǵan. Bul týraly habar keshki saǵat 20.37-de túsken.
«23 qarasha kúni saǵat 13.00-de izdestirý-qutqarý jumystaryna qatysý úshin Oral qalasynyń áýejaıynan «Evrokopter» áýe ushaǵy kóterildi. Buǵan barlyǵy ekıpajda 3, jeke quramnan 25 adam, 9 tehnıka jumyldyryldy. BQO TJ departamenti turǵyndarǵa aýa raıynyń ózgerýin baqylap, abaı bolyp, engizilgen shekteýler týraly aqparatpen tanysýǵa keńes beredi. Aqparatty 112 qutqarý qyzmetiniń telefon nomeriniń habarlamasynan, sondaı-aq «Darmen» mobıldi qosymshasynyń kómegimen naqtylaýǵa bolady. Sonymen qatar saparǵa shyǵa qalǵan jaǵdaıda otyn qory bar kanıstr (keminde 20 l) jáne quıýǵa arnalǵan ydys, shaı termosy jáne azyq-túlik qory men jyly kıimniń bolýy, eń bastysy, avtokólik tehnıkalyq jaramdy kúıde bolýy kerek. Tótenshe jaǵdaı týyndaǵan jaǵdaıda «112» telefon nómirine qońyraý shalý qajet», dep habarlady vedomstvodan.
Eske sala keteıik, budan buryn Oralda aýa raıyna baılanysty ushaqtar ushpaı jatqanyn jazǵan bolatynbyz.
Sondaı-aq Batys Qazaqstanda elektr jelileri úzilip, joldar jabyldy.
Oral qalasynda qar tazalaý jumystary júrgizilip jatyr.