BQO-da Bókeı handyǵynyń 225 jyldyǵyna oraı daıyndyq sharalary bastaldy

ORAL. QazAqparat – Batys Qazaqstan oblysynda 2026 jyly atalyp ótiletin Bókeı handyǵynyń 225 jyldyǵyna oraı daıyndyq is-sharalary bastaldy, dep habarlaıdy QazAqparat tilshisi.

Oblys ákimi Ǵalı Esqalıevtiń BAQ ókilderimen kezdesýinde málim etkenindeı, Bókeı ordasy aýdanyndaǵy Han ordasy mýzeı-qoryǵy – elimizdegi kıeli oryndardyń biri.

1801 jyly Bókeı sultan qaramaǵyndaǵy elmen Edil men Jaıyq aralyǵyna ótse, 1826 jyly Jáńgirdiń Han ordasynyń negizin qalaǵany málim.

QazAqparat tilshisiniń saýalyna jaýap bergen óńir basshysynyń aıtýynsha, tarıhı oryndardy jańǵyrtý jumystaryn jalǵastyrýmen qatar týrısterdiń Han ordasyna qysy-jazy baryp turýy úshin jaǵdaı da jasalýy qajet. Osy maqsatta qazirgi ýaqytta Bókeı ordasy aýdany baǵytynda qurylysy júrip jatqan respýblıkalyq joldan Han ordasyna qaraı uzyndyǵy 25 shaqyrym kirme jol da salynady.

BQO ákiminiń orynbasary Baqytjan Narymbetovtiń tolyqtyrǵanyndaı, Han ordasy mýzeı-qoryǵynda bıyl «Qarashyǵanaq Petrolıým Opereıtıng b.v.» kompanııasynyń áleýmettik ınvestıtsııasy esebinen vızıt ortalyǵy men ákimshilik ortalyǵy qurylysy bastalady. Buǵan 413 mln teńge qaralǵan.

Onyń sózine qaraǵanda, qazirgi tańda mýzeı qyzmetkerleri tarıhı ǵımarattardyń ishinde otyr. Sondyqtan qyzmet aıasyn keńeıtip, sharýashylyq jumystaryn uıymdastyrý úshin atalǵan nysandar boı kóteredi. Sonymen qatar oblys ákimdiginen Qazaqstan Mádenıet jáne sport mınıstrligine 2023-2025 jyldarǵa úsh jyldyq bıýdjetke engizý úshin tarıhı nysandardy qaıta jańǵyrtý maqsatynda usynystar berildi. Oral qalasyndaǵy kóne ǵımarattardy qosqanda, buǵan 1 mlrd astam teńge kerek.

Han ordasy aýyly mańyndaǵy Jáńgir han, dáýlesker kúıshi Dáýletkereı, qazaqtyń tuńǵysh ǵalymdarynyń biri Muhamed-Salyq Babajanovtar jerlengen panteon eskirgen, bul da qaıta jóndeledi.

«Bókeı handyǵynyń 225 jyldyǵyna oraı halyqaralyq deńgeıde ǵylymı-praktıkalyq konferentsııa uıymdastyrý josparlanyp otyr. Oǵan qosa oıyn-saýyq, dala qyzyqtary, mádenı-sporttyq sharalar mindetti túrde ótedi. Oral qalasynda Bókeı hanǵa eskertkish ornatyla ma? degen saýalǵa oraı aıtarymyz, eger turǵyndar, zııaly qaýym ókilderi tarapynan naqty usynystar tússe, qarastyratyn bolamyz», - dedi B.Narymbetov.