BQO-da bıyl 15 mlrd teńgege 11 joba júzege asyrylmaq
Sonyń ishinde úsh jobany iske qosý maqsatynda shetel ınvestorlary tartyldy. Jýyrda EKSPO-2017 kórmesi alańynda BQO ákimi Fınlıandııa eliniń basshysymen kezdesken bolatyn. Fınder BQO aýmaǵynda úsh jobany júzege asyrýdy bastady. Sonyń biri - «Steklo-Servıs» JShS-men birlesken joba. Kásiporyn esik-terezeler shyǵarýmen qatar aldaǵy ýaqytta fın tehnologııasy negizinde jıhaz óndirisin jolǵa qoıýdy oılastyrýda.
Sol sekildi BQO-da Shveıtsarııa jáne Túrkııa eliniń kásipkerlerimen birlesip qurylǵan «Oral elektrık» kásiporny suranysqa ıe sapaly ónim túrlerin, ıaǵnı elektr tehnıkalyq jabdyqtar usynbaq. Al ırandyq «Falızan» kompanııasymen birlesken kásiporyn munaı-hımııa ónimderin shyǵarmaqshy. Bul jobalardyń barlyǵy eksportqa baǵyttalǵan.
«Jelaev nan ónimderi kombınaty» AQ - ıtalııalyq tehnologııalar kómegimen joǵary sapaly ónim shyǵaratyn klasterlik óndiris. Kombınat tek ishki suranysty ǵana qanaǵattandyryp qoımaı, eksportqa da ónim jóneltedi.
«Agran» JShS - ońtústik koreıalyq qurylǵylar kómegimen sendvıch-panel shyǵaratyn zamanaýı kásiporyn. Atalmysh óndiris ornynyń ónimderine suranys óte joǵary, tek Batys Qazaqstan oblysy úshin jylyna 150 myń sharshy metr ónim qajet. Aldaǵy ýaqytta «Agran» JShS jylyna 500 myń sharshy metr ónim shyǵarýdy josparlap otyr. Bıyl zaýyt 6 paıyzdyq mólsherlememen sýbsıdııa túrinde memlekettik qoldaýǵa ıe boldy, endi kásiporyn óz ónimderin eksportqa baǵyttaýdy kózdep otyr.
Osy óndiris oryndarynyń jumysymen tanysqan Altaı Kólginov atalǵan jobalar aldaǵy ýaqytta BQO ákimdiginiń qadaǵalaýynda bolatyndyǵyn jáne ınvestıtsııa tartý, jańa jumys oryndaryn ashý baǵytyndaǵy jumystar jalǵasyn tabatyndyǵyn jetkizdi.