BQO-da bir mandattyq okrýgter boıynsha 543 kandıdat tirkeldi
BQO aýmaqtyq saılaý komıssııasynyń tóraǵasy Ǵaısa Qapaqovtyń málim etkenindeı, oǵan qosa partııa tizimi boıynsha 64 úmitker báıgege qosyldy.
Onyń aıtýynsha, bir mandattyq okrýgter boıynsha óńirde 620 adam usynylǵan bolatyn. Sonyń ishinde Májiliske usynylǵan 14 adamnyń 11-i tirkeldi. Máslıhattarǵa usynylǵan 606 adamnyń 532-si tirkeýden ótti.
Oblystyq máslıhatqa 48 (15 okrýg boıynsha), qalalyqqa 81 (24 okrýg), aýdandyq máslıhattarǵa 403 kandıdat (134 okrýg) ótýge tyryspaq. Ózin-ózi usynǵan 40 úmitker saılaýǵa qatysýdan bas tartyp, qujattaryn keri alsa, 34-i jarna tólemegendikten, tirkeýden ótken joq.
Kandıdattardyń 70 paıyzy er adamdar bolsa, qalǵany – áıelder. Olardyń eń jasy 22-de, eń úlkeni 68 jasta.
«Qazirgi kezde úmitkerler saılaýaldy úgit-nasıhat jumystaryn júrgizýde. Olarǵa úgit-nasıhat úshin tıisti kólemde qarjy bólingen», dedi Ǵ.Qapaqov.
Eske sala keteıik, budan buryn Batys Qazaqstanda Májilis pen máslıhattarǵa 673 kandıdat usynylǵanyn jazǵan bolatynbyz.