BQO-da bir kúnde 400-ge jýyq adam tranzıttik júk kóligimen shekaradan ótken

ORAL. QazAqparat – Batys Qazaqstan oblysynda keshe 391 adam tranzıttik júk kólikterimen shekaradan ótken. Bul týraly brıfıngte BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵalı Aryspaev málim etti, dep habarlaıdy QazAqparat tilshisi.

Budan buryn memlekettik komıssııanyń shuǵyl shtaby BQO-da júk tasymalymen aınalysatyn 25 jáne 27 jastaǵy ózbekstandyq eki azamattan koronavırýs anyqtalǵanyn habarlaǵan bolatyn.

M.Aryspaevtyń aıtýynsha, koronavırýs juqtyrǵan osy eki adammen birge Máskeýden Tashkentke bet alǵan sol kólikte taǵy bir ózbekstandyq júrgizýshi bolǵan. Odan koronavırýs juqpasyna alynǵan test teris nátıje kórsetti. Biraq ol provızorlyq aýrýhanaǵa jatqyzyldy, dárigerlerdiń baqylaýynda.

Koronavırýs juqtyrǵan eki adammen baılanysta bolǵan úsh epıdemıolog ta tekserýden ótip, synamasy teris nátıje kórsetti.

«Kúni búgin oblysta 119 adam karantınde jatyr. Sonyń ishinde alty naýqas oblystyq juqpaly aýrýlar aýrýhanasynda em alyp jatsa, 59 adam karantındik statsıonarda, 54-i provızorlyq gospıtalda baqylanýda», dedi M.Aryspaev.

M.Aryspaevtyń sózine qaraǵanda, tranzıttik júk kólikteri qalaǵa kirmeıdi, jol-patrýldik polıtsııanyń kómegimen aınalyp ótedi.

Eske sala keteıik, budan buryn BQO-da koronavırýs juqtyrǵan eki adamnyń Ózbekstan azamaty bolyp shyqqanyn, taǵy bir naýqastyń aýrýhanadan shyǵýǵa daıyndalyp jatqanyn jazǵan bolatynbyz.