BQO-da bir aptada koronavırýs juqtyrǵandar shamamen 30 paıyzǵa ósti

ORAL. QazAqparat – Batys Qazaqstan oblysynda sońǵy aptada aldyńǵymen salystyrǵanda, koronavırýs juqtyrǵandar sany 29,7 paıyzǵa (200 naýqasqa) artty, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, sońǵy táýlikte indet tabylǵandar sany 126-ǵa jetse, 45 naýqas jazylyp shyqty.

Jyl basynan beri aýyrǵan 15641 adamnyń 54,8 paıyzy (8585) Oral qalasy, 14,4 paıyzy (2254) Báıterek, 11,3 paıyzy (1777) Bórli aýdanynyń úlesine tıedi.

Oblys boıynsha qazirgi kezde 1123 tósektik 18 ınfektsııalyq statsıonar 44,4 paıyzǵa tolyp, olarda 499 naýqas emdelýde. Ásirese, Oral qalasynda 600 tósektik 5 ınfektsııalyq statsıonar 70 paıyzǵa (420 naýqas) tolǵan. Sondaı-aq 72 tósektik jansaqtaý bólimshelerinde 40 naýqas (55,5 paıyz) emdelýde.

Basqarma málimetine qaraǵanda, indet bastalǵannan beri koronavırýs juqtyrǵan 24862 adamnyń 20033-i jazyldy. 385 naýqas kóz jumdy.

Óńirde koronavırýsqa qarsy 95064 adam vaktsınanyń birinshi, 62977-si ekinshi komponentimen egildi.

Eske sala keteıik, budan buryn BQO-da ınfektsııalyq statsıonarda jatqandar sany 500-den asqanyn, maýsymda 2200-ge jýyq adamnan koronavırýs anyqtalǵanyn jazǵan bolatynbyz.

Sondaı-aq BQO-da ekpe alǵandar arasynda lotereıaǵa bas júldege avtokólik tigildi.