BQO-da balalar lageriniń dırektory óz ulyna zańsyz joǵary jalaqy tólegen

<p>Batys Qazaqstan oblysy Báıterek aýdanynyń prokýratýrasy balalar lagerlerinde tekseris júrgizip, qylmystyq ister qozǵady, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Óńir prokýratýrasynyń málimetine súıensek, tekseris barysynda «Tárbıe jumysy ortalyǵy» memlekettik kommýnaldyq qazynalyq kásipornynyń dırektory tıisti bilimi jáne biliktiligi joq óziniń balasyn «Jas ulan» balalar lagerine jumysqa zańsyz qabyldaǵany anyqtaldy. Onyń ústine oǵan belgilengen kólemnen artyq jalaqy aýdarylǵan.

«Aýdan prokýratýrasynyń qadaǵalaý aktisimen MKQK dırektory zańsyz artyqshylyq bergeni úshin «Memlekettik qyzmet týraly» Zańnyń 50-babynyń 1-tarmaǵynyń 4-tarmaqshasy negizinde qyzmetke tolyq sáıkes emestigi týraly eskertý túrindegi tártiptik jaýapkershilikke tartyldy. Artyq aýdarylǵan jalaqy memleketke qaıtaryldy», - delingen málimette.

Sondaı-aq BQO prokýratýrasy tekseris kezinde «Dostyq» balalar lageriniń ǵımaraty apatty jaǵdaıda ekendigi jáne mekeme sanıtarlyq-epıdemıologııalyq, órt qaýipsizdigi talaptaryna qaıshy jumys istegendigi belgili bolǵan.

«Lagerdiń 13 jumysshysynda tıisti medıtsınalyq ruqsattary bolmady.

Sonymen qatar balalar lageriniń meńgerýshisi adamdardy jumysqa jalǵan ornalastyrý arqyly bıýdjet qarajatyn jymqyrǵany jáne senip tapsyrylǵan múlikti talan-tarajǵa salǵany anyqtaldy», - delingen usynylǵan habarlamada.

Anyqtalǵan faktiler boıynsha Báıterek aýdany prokýratýrasynyń bastamasymen Qylmystyq kodekstiń 189-babynyń 2-bóligimen (adamdar tobynyń aldyn ala sóz baılasýymen qyzmet babyn paıdalanyp bótenniń múlkin talan-tarajǵa salý) jáne 190-babynyń 2-bóligimen (qyzmet babyn paıdalanyp jasalǵan alaıaqtyq) qylmystyq ister tirkelgen.

«Keıinnen memleketke keltirilgen zalaldyń tolyq kólemde ótelýine baılanysty qylmystyq ister aqtalmaıtyn negizder boıynsha toqtatyldy», - dep naqtylady prokýratýradan.