BQO-da balaǵat sóz aıtqan aýyl ákimi tártiptik jaýapkershilikke tartyldy

<p>ORAL. KAZINFORM &ndash; QR Memlekettik qyzmet isteri agenttiginiń Batys Qazaqstan oblysyndaǵy Ádep jónindegi keńesiniń otyrysynda Aqjaıyq aýdany Jańabulaq aýyldyq okrýginiń ákimi Jambyl Dabysqalıevtiń tártiptik isi qaraldy.</p>

QR Memlekettik qyzmet isteri agenttiginiń BQO boıynsha departamenti júrgizgen qyzmettik tergep-tekserý barysynda anyqtalǵanyndaı, okrýg ákimi J.Dabysqalıev bıylǵy 1 qyrkúıek kúni aýyl turǵyny Mereke Esqalıevke qatysty balaǵat sóz aıtýǵa jol bergen.

J.Dabysqalıevtyń túsiniktemesinen málim bolǵanyndaı, Jańabulaq turǵyndary kóptegen jınalystar men jeke qabyldaýlarda aýyldyń tazalyǵy men qaýipsizdigin saqtaý, asfalt joldy buzbaý úshin úlken tehnıkalardy kirgizbeý kerektigin suraǵan. Sodan keıin aýyl ishinde júk kólikteriniń qozǵalysyn shekteý jóninde ózara kelisimge kelgen. Alaıda 1 qyrkúıek kúni Jańabulaq aýyldyq okrýgi ákimi apparatynyń kúzetshisi aýyl ishinde shóp tıegen júk kóligi júrgenin habarlaǵan. Aýyl ákimi júk kólik ıelerimen sóılesip, aýyl ishine aınalma joldar arqyly kirýge bolatynyn jetkizgen. Sol jerde M.Esqalıev sózge aralasyp, shóp alyp kelse, aýyl ishimen júretinin alǵa tartyp, ákimge balaǵat sózder aıtqan. 

Ádep jónindegi keńes otyrysynda J.Dabysqalıev kóńil-kúı aýanyna berilip, óziniń balaǵat sóz aıtyp qalǵanyn moıyndady. 

Keńes músheleri talqylaı kele, J.Dabysqalıevke sógis túrindegi tártiptik shara qoldaný týraly toqtamǵa keldi. 

Ádep jónindegi keńes otyrysynda basqa da máseleler qaralyp, tıisti sheshimin tapty.

Eske sala keteıik, budan buryn Oralda komıssııanyń ákimdiktiń apparat basshysyna zańsyz páter bergenin jazǵan bolatynbyz.