BQO-da azyq-túlik qaýipsizdigin qamtamasyz etý baǵytynda 94 ınvestıtsııalyq joba júzege asyrylýda

ORAL. QazAqparat – Batys Qazaqstan oblysynda Prezıdent tapsyrmasyna sáıkes azyq-túlik qaýipsizdigin qamtamasyz etý baǵytynda tıisti is-sharalar qabyldanýda. Bul týraly oblys ákimi Ǵalı Esqalıevtiń tóraǵalyq etýimen ótken keńeste aıtyldy, dep habarlaıdy QazAqparat tilshisi.

BQO aýyl sharýashylyǵy basqarmasy basshysynyń orynbasary Denıs Omashevtiń málim etkenindeı, óńirde azyq-túlik taýarlarymen qamtý jumystary 24 ataý boıynsha júrgiziledi.

Atap aıtqanda, azyq-túlik taýarlarynyń 10 ataýy boıynsha oblys ózin 100 paıyz jáne odan joǵary kólemde qamtamasyz etedi. Tórt ataý boıynsha 70 paıyz jáne odan joǵary. Al 10 ataý boıynsha ózgelerge ishinara jáne tolyq táýeldi.

Sút, kókónis jáne basqa da azyq-túlik taýarlarynyń jetispeıtin bóligi elimizdiń ońtústik óńirlerinen jáne Reseıden ákelinedi.

D.Omashevtiń sózine qaraǵanda, osy baǵytta tapshylyqtyń ornyn toltyrý jáne azyq-túlik taýarlarynyń óndirisin ulǵaıtý maqsatynda agroónerkásip kesheni salasynda 2021-2025 jyldary 164,7 mlrd teńgeni quraıtyn 94 ınvestıtsııalyq jobany júzege asyrý kózdelgen bolatyn. Sonyń ishinde mal sharýashylyǵynda 59,7 mlrd teńgege 63 joba, ósimdik sharýashylyǵynda 100,2 mlrd teńgege 22 joba, 4,8 mlrd teńgege 9 joba qarastyrylǵan.

2021 jyly 18,4 mlrd teńgege 18 joba júzege asyryldy. Sonyń ishinde birqatar iri jobalar bar. Mysaly, «World Green Company» JShS jyldyq kókónis óndirý kólemi 8 myń tonnaǵa deıin, aýdany 12 ga tórt býyndy jylyjaı keshenin salyp, jumysyn júrgizýde, jobanyń quny – 14 mlrd teńge. Al «Uralsk Trade Company» JShS jylyna 47 myń tonna daıyn ónim óndiretin sút zaýytyn ashyp, óndiristi (1 mlrd teńge) iske qosty. «Baystone» JShS 4 myń tonnalyq kókónis qoımasyn (1,1mlrd teńge) saldy.

Bıyl 28,9 mlrd teńgege 36 jobany júzege asyrý josparlanyp otyr.

Sondaı-aq óńirdegi sút jáne kartop-kókónis óndirisin ulǵaıtý maqsatynda sút jáne jasyl beldeýlerdi qurý jospary jasaldy. Óńir jergilikti sút óndirisimen tek 20 paıyzǵa ǵana qamtylyp otyr, qalǵan 80 paıyzy oblystan tys jerlerden jetkiziledi. Sondyqtan Báıterek, Bórli, Syrym, Tasqala, Terekti aýdandary men Oral qalasynda sút beldeýin quryp, sút óndirý kólemin 45,9 myń tonnaǵa deıin ulǵaıtý oılastyrylýda. Joba aıasynda 4 iri keshenmen qatar, shaǵyn 11 taýarly sút fermasy, sútti qaıta óńdeıtin shaǵyn modýldik kásiporyndar qurylmaqshy.

«Sol sekildi oblys halqynyń kartop pen kókónis ónimderine qajettiligin tolyq óteý baǵytynda 2025 jylǵa deıin kartop alqabyn 708 ga, qyryqqabatty 465 ga, sábizdi 725 ga jáne pııazdy 255 gektarǵa ulǵaıtý kózdelýde. Oǵan qosa osy kezeńde segiz kásiporyn jalpy syıymdylyǵy 27,3 myń tonnalyq 9 zamanaýı kókónis qoımasyn salmaqshy. Sonyń beseýi bıyl boı kótermekshi. Bul baǵytta da memleket tarapynan qoldaý kórsetiletin bolady», dedi D.Omashev.

Óńir basshysy Ǵalı Esqalıev jıyn barysynda azyq-túlik taýarlarynyń baǵasyn ósirmeý baǵytynda kúndelikti monıtorıng júrgizip, qajetti sharalardy qabyldaý kerektigin atap kórsetti.