BQO-da az qamtylǵan otbasy balalary lagerde 50 paıyz jeńildikpen demala alady

ORAL. QazAqparat – Batys Qazaqstan oblysynda áleýmettik az qamtylǵan otbasy balalary lagerde 50 paıyz jeńildikpen demala alady, dep habarlaıdy QazAqparat tilshisi.

BQO sybaılas jemqorlyqqa qarsy is-qımyl departamentiniń baspasóz qyzmetinen málim etkendeı, bilim berý salasyndaǵy sybaılas jemqorlyq táýekelderine syrtqy taldaý júrgizý barysynda oblystyń barlyq aqyly lagerlerinde jeńildikti rejım belgilenbegeni anyqtalǵan.

BQO-da balalardyń jazǵy lagerlerindegi jeńildikter halyqtyń áleýmettik osal toptaryndaǵy balalardyń barlyq sanattary úshin 50 paıyzǵa deıin ulǵaıtyldy.

«Bul rette «Bilim týraly» Zańǵa sáıkes memleket áleýmettik kómekke muqtaj azamattardyń olardyń bilim alýy kezeńindegi qarjy shyǵystaryn tolyq nemese ishinara óteıdi. Qazirgi ýaqytta oblysta atalǵan sanattaǵy balalardyń sany – 12 627, sonyń ishinde 1 355-i qosymsha bilim berý uıymdaryna barady. Osy lagerlerde («Eýrazııa» týrıstik-saýyqtyrý kesheni, «Samal» týrıstik lageri, «Daryn» qosymsha bilim berý ortalyǵy, «Atameken» balalar-jasóspirimder týrızmi jáne ekologııa ortalyǵy) 50 paıyz jeńildikterdi qoldaný týraly tolyq aqparatty BQO-nyń bilim basqarmasyna júginý arqyly alýǵa bolady», dep habarlady vedomstvodan.

Eske sala keteıik, budan buryn Batys Qazaqstanda 680 balalar lageri jumys istep turǵanyn jazǵan edik.