BQO-da áıgili kúıshiler dombyralarynyń kóshirmesi jasaldy
Sharaǵa kelgender, aldymen, sheberler jasaǵan dombyra kórmesin tamashalady.
Qurmanǵazy Saǵyrbaıuly dombyrasynyń kóshirmesi belgili kúıshi ári sheber Edige Nábıevtiń qolynan shyqty. Sol sekildi Medet Tólegenov – Dına Nurpeıisovanyń, Dına Quspanova – Mahambet Ótemisulynyń, Janpeıil Seıtaq – Seıtek Orazalyulynyń, Abzal Hamıtov – Qalı Jantileýovtiń, Beıbitáli Dosqalıev – Oqap Qabıǵojınniń, Aslan Serikbaev – Ǵarıfolla Qurmanǵalıevtiń, Dosjan Bıjanov – Esel Qazıevtiń, Tilek Máýlenov – Sabyr Muqatovtyń, Sansyzbaı Ahmetov Erǵalı Esjanovtyń dombyrasyn jasady.
Uıymdastyrýshylardyń sózine qaraǵanda, 2024 jyly oblystyq halyq shyǵarmashylyǵy ortalyǵynyń qurylǵanyna 80 jyl tolatynyna baılanysty mýzeı ashý josparǵa engizildi. Osyǵan oraı dombyra kóshirmeleri oblystyq halyq shyǵarmashylyǵy ortalyǵynyń mýzeı qoryna tabystalady.
Festıvalge qatysyp, sóz sóılegen oblys ákiminiń orynbasary Baqytjan Narymbetov dombyra – qazaqtyń boıtumary, ulttyq qundylyqtyń sımvoly, dombyra qazaq ultynyń tarıhynda qarapaıym halyqtyń qýanyshy men qaıǵy-qasiretin teń bólisip, el basyna qater tóngen tusta kóńiline jubanysh bola bilgen kıeli de qasıetti aspap ekendigin jetkizdi.
«Qazaqstan Prezıdenti Qasym-Jomart Toqaev atap ótkendeı, halqymyzdyń tól mádenıeti men ónerin dombyrasyz elestetý múmkin emes. «Biz ózimizdiń ulttyq mýzykalyq aspabymyzdyń álemdik qoǵamdastyq moıyndaǵan mádenı mura ekenin maqtan tutamyz. Bul baǵa jetpes múlikti saqtaý jáne atadan balaǵa mura etý – árqaısymyzdyń qasıetti mindetimiz», – dep Memleket basshysy aspaptyń árbir qazaqstandyqtyń rýhanı ómirindegi rólin atap ótti. Ulttyq dombyra kúni bizdiń ulttyq qundylyqtarymyzdy ardaqtaıtyn, oı salatyn, rýhanı jańǵyrýymyzǵa qomaqty úles qosatyn shýaq pen shattyqqa toly merekege aınaldy», - dedi B.Narymbetov.
Budan keıin dombyra kóshirmelerin jasaǵan sheberlerdiń bárine oblys ákiminiń alǵyshaty men 100 myń teńgelik sertıfıkattar tabys etildi. Sondaı-aq óńirdegi óner maıtalmandary QR mádenıet jáne sport vıtse-mınıstriniń alǵyshattarymen marapattaldy.
Jańadan jasalǵan dombyra kóshirmelerimen Qurmanǵazy, Dına, Seıtek, Oqap Qabıǵojın, Erǵalı Esjanov, Sabyr Muqatovtyń kúıleri oryndalyp, Mahambet termesi men Ǵarıfolla Qurmanǵalıevtiń «Aqjaıyq» áni shyrqaldy.
«Qazaq - naǵyz qazaq emes, naǵyz qazaq – dombyra!» dep Qadyr aǵamyz aıtqandaı, dombyra qazaq halqymen birge jasap keledi. Іlki kezde áýeli qobyz, sodan keıin toǵyzynshy ǵasyrda dombyra paıda boldy delindi. Keıin dombyra tarıhy odan áride dep jazyldy. Osy kúnge deıin qazaqtyń qasıetti aspabynyń qashan shyqqany áli naqtylanǵan joq. Qalaı desek te, qazaq eki ishekpen búkil qaıǵysyn, qýanyshyn, jan syryn jetkize bilgen. Sondyqtan dombyra ár úıdiń tórinde turýy kerek. Qazaq barda dombyra ólmeıdi», - dedi QazAqparat tilshisine belgili dombyrashy, Qazaqstannyń eńbek sińirgen mádenıet qyzmetkeri, «Qurmet» ordeniniń ıegeri Ermek Qazıev.
Búgin, Dombyra kúni sondaı-aq Qurmanǵazy men Dına, Ǵarıfolla Qurmanǵalıevtiń eskertkishine gúl shoqtary qoıyldy.
Eske salaıyq, budan buryn Erkin Nurymbetovpen qasıetti kúı óneri týraly suhbat jarııalaǵan bolatynbyz.