BQO-da aýyz sý qubyrynan bakterııalar tabyldy

ORAL. QazAqparat  - Terekti aýdany Fedorov aýylynda sý tazalaǵysh stansadaǵy sýdyń synamasynan kolımorfty bakterııalar tabyldy, dep habarlaıdy QazAqparat tilshisi.

BQO prokýratýrasynyń baspasóz qyzmetinen alynǵan málimetke qaraǵanda, atalǵan aýyl turǵyndarynan aýyz sý sapasynyń tómendigi jáne ony berýde irkilistiń jıi oryn alatyny jóninde áleýmettik jeli arqyly shaǵymdar túsken.

Soǵan baılanysty Terekti aýdany prokýratýrasynyń tapsyrmasy boıynsha aýdandyq qoǵamdyq densaýlyq saqtaý basqarmasy tekseris júrgizgen.

Prokýratýranyń usynysy negizinde turǵyndardyń sanıtarlyq-epıdemıologııalyq qaýipsizdigi salasyndaǵy zańnama talaptaryn buzǵany úshin «Terekti taza sý» kásipornyna 10 AEK kóleminde ákimshilik aıyppul salyndy.  

Budan bólek, «Terekti taza sý» kásiporny sý qubyry jelisin dezınfektsııalap, stantsııadaǵy sý tazalaıtyn súzgi aýystyryldy. Sonymen qatar, sýdyń úzilissiz berilýi men jumysshylar arnaıy kıimmen qamtamasyz etildi.

Osylaısha aýyldaǵy 5 myń turǵynnyń quqyǵy qorǵaldy.