BQO-da aýylǵa eńbek etýge baratyn mamandardyń kóterme aqysy artty

<p>ASTANA. KAZINFORM &ndash; Batys Qazaqstan oblysynda qaladan aýylǵa jumys isteýge barǵan mamandarǵa beriletin kóterme aqy 5 mln teńgeden 8 mln teńgege deıin artty. Bul týraly óńir ákimi Narıman Tóreǵalıev málim etti.</p>

«Ulttyq statıstıka bıýrosynyń derekterine sáıkes, eńbek naryǵyndaǵy ekonomıkalyq turǵydan belsendi halyqtyń sany 353 000 adam bolsa, onyń ishinde 16904 adam jumyssyz. Óńirdegi jumyssyzdyq deńgeıi 4,8%, áıelder arasyndaǵy jumyssyzdyq deńgeıi 5,1%, al jastar arasyndaǵy jumyssyzdyq deńgeıi 3,9%-dy quraıdy. 2024 jylǵy 1 qarashada 26 810 adam jumysqa ornalasty, osylaısha jospar 94% oryndaldy», - dedi Narıman Tóreǵalıev Ortalyq kommýnıkatsııalar qyzmeti alańynda ótken baspasóz máslıhatynda. 

Odan ári oblys ákimi óńirdegi áleýmettik jaǵdaıdy jetildirý jumystaryna toqtaldy. 

«Aýyldyq densaýlyq saqtaýdy jańǵyrtý» jobasy aıasynda 2025 jylǵa deıin jańa 50 nysan qurylysy josparlanǵan, onyń 12-si 2023 jyly paıdalanýǵa berildi. Qalǵany boıynsha bıyl qurylys jalǵasyp jatyr. Oǵan qosa, 13 nysan kúrdeli jóndeýden ótýde. Aýylda maman tapshylyǵyn azaıtý máselesi de nazarda. Osy jyly medıtsına mamandaryna rezıdentýraǵa 9 jáne abıtýrıenterge 45 grant bóldik, sonymen qatar beriletin kóterme aqyny 5 mln teńgeden 8 mln teńgege deıin kóterdik. Bıyl 131 medıtsına mamandary jumysqa qabyldandy», - deıdi ol.