ORAL. KAZINFORM — Batys Qazaqstan oblysy Aqjaıyq aýdanynyń prokýratýrasy taldaý júrgizý nátıjesinde aýdan ákimdiginiń alys eldi mekenderde turatyn balalardy mektepke tasymaldaý tártibin aıqyndamaǵanyn anyqtady.
BQO prokýratýrasynyń baspasóz qyzmetinen málim etkenindeı, «Avtomobıl kóligi týraly» QR Zańyna sáıkes aýdandardyń ákimdikteri shalǵaıdaǵy eldi mekenderde turatyn balalardy jalpy bilim beretin mektepterge tasymaldaýdyń shemasy men tártibin ázirleıdi jáne bekitedi.
— Taldaý barysynda Esensaı — Jazıra — Tasoba, Aqsýat — Aqbulaq, Aqsýat — Saharnyı, Talap — Átibek, Bazarsholan — Baıantóbe jáne basqa baǵyttarda barlyǵy 90-ǵa jýyq oqýshynyń tasymaly rettelmegeni belgili boldy. Prokýratýranyń aýdan ákimine engizgen usynymy negizinde tıisti qaýly qabyldandy. Osylaısha, mektebi joq eldi mekenderden 88 balanyń qaýipsiz tasymalyna qatysty másele sheshildi, — dep habarlady vedomstvodan.
Eske sala keteıik, budan buryn Batys Qazaqstanda balabaqshada 26 mln teńge mindetti tólemniń tólenbeı qalǵanyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).