BQO-da alys aýdandy Oralmen jalǵastyratyn jol paıdalanýǵa berildi

<p>ORAL. KAZINFORM &mdash; Batys Qazaqstan oblysynda respýblıkalyq mańyzy bar Kaztalov-Jánibek-Reseı shekarasy avtojolynyń 95-138 shaqyrym bóligi paıdalanýǵa berildi.</p>

Jalpy quny 12,5 mlrd teńgeni quraıtyn jobanyń tapsyrys berýshisi «QazAvtoJol» UK» AQ bolsa, merdigeri – «Temirjol jóndeý» JShS.

«QazAvtoJol» UK» AQ basqarma tóraǵasynyń keńesshisi Marat Mahambetovtiń málim etkenindeı, uzyndyǵy 43 shaqyrymǵa eki qabattan turatyn asfalt-beton tóselip, sý ótkizgish 17 qubyr ornatyldy. Bul jumystarǵa 85 arnaıy tehnıka men 150-den astam adam jumyldyryldy.

«Qazirgi kezde jol jıekterin nyǵaıtý, ótpelerdi ornatý men joldy abattandyrý jáne jol belgilerin ornatý jumystary júrgizilýde. Jobaǵa sáıkes modýldi sanıtarlyq-gıgıenalyq toraby bar, demalys alańdary da ornatylmaq. «Temirjol jóndeý» kompanııasy sonymen qatar Jánibek aýdany Ónege aýylynda jyl sońyna deıin jol paıdalaný pýnktin salyp bermek. Sebebi Ónegeden Jánibekke deıin 45, Bókeı ordasy aýdany ortalyǵy Saıqynǵa deıin 100 shaqyrym, ıaǵnı jol osy arada túıisedi. Kaztalov-Jánibek baǵytyndaǵy joldyń 0-95 shaqyrym ýchaskesin «Uniserv» JShS 30 qazanda tolyqtaı aıaqtamaqshy. Sol sekildi Ónege-Bısen-Saıqyn (103 shaqyrym) jolyn «Atyraý joldary» JShS bıyl bitiredi», - dedi M.Mahambetov.

Osylaısha, buryn turǵyndar kóktemgi jáne kúzgi laısań kezinde Jánibek pen Oraldyń arasynda qıyndyq kórse, qazir 4-5 saǵatta jetedi.

Eske sala keteıik, budan buryn BQO-da tarıhı Han ordasy aýylyna aparatyn jol salynatynyn jazǵan edik.