BQO-da «Alash barysy» 1 mln teńge júldege ıe boldy

ORAL. QazAqparat - Syrym aýdany ortalyǵy Jympıty aýylynda Alash úkimetiniń 100 jyldyǵyna arnalǵan qazaq kúresinen «Alash barysy» respýblıkalyq týrnıri márege jetti, dep habarlaıdy «QazAqparat» tilshisi.

Syrym elinde alǵash uıymdastyrylǵan jarystyń ashylý rásiminde aýdan ákimi Tólegen Tóreǵalıev, BQO dene shynyqtyrý jáne sport basqarmasynyń basshysy Ásııa Amanbaeva jáne qazaq kúresinen «Qazaqstan barysy - 2017» respýblıkalyq týrnıriniń jeńimpazy Elaman Erǵalıev jınalǵandardy quttyqtap, aıtýly dodaǵa qatysýshylarǵa sáttilik tiledi.

Jýrnalıst, aıtysker aqyn Baýyrjan Shırmedınulynyń málim etkenindeı, týrnırge Astana qalasynan, Aqtóbe jáne Batys Qazaqstan oblystarynan qyryqtan astam palýan qatysyp, olar 90 kelige deıin jáne 90 keliden joǵary salmaq dárejeleri boıynsha eki topqa bólinip, baq synady. Aldymen salmaǵy 90 kelige deıingiler arasynda myqtylar belgili boldy. Bul oraıda Syrym aýdanynyń palýandary eshkimge des bermedi. Fınalda Nurymjan Ǵabbasov pen Aıbol Orazǵalıevtiń beldesýi tartysty boldy. Oraıly sátti qur jibermegen Nurymjan jeńimpaz atandy. Al úshinshi orynǵa Aıbek Ǵabdeshev kóterildi.

Salmaǵy 90 keliden asatyndar arasynda 15 palýan kilemge shyqsa, sonyń teń jartysyna jýyǵy QR Prezıdentiniń júldesi úshin dástúrli túrde ótip kele jatqan «Qazaqstan barysy» respýblıkalyq týrnırine qatysyp úlgergen. Sonyń biri - Jánibek aýdanynyń atynan shyǵyp júrgen, negizi Qaztalovtyń Aqpáterinde týyp-ósken Ernazar Hamzın. Bıyl Astanada ótken «Qazaqstan barysyna» alǵash ret qatysyp kelgen Ernazardyń salmaǵy toqsan keliden sál asatyn bolar. Biraq bul joly salmaǵy ózinen áldeqaıda joǵary palýandardy buıym qurly kórgen joq. Fınaldyq synda qaratóbelik Darhan Temirhanovty qapy qaldyryp, jaýyrynyn jer ıisketken E.Hamzın týrnır jeńimpazy atanyp, 1 mln teńge kólemindegi júldege ıe boldy. Onyń bapkeri - Jeńis Stamǵazıev. D.Temirhanov ekinshi, bórlilik, bıyl «Qazaqstan barysy» respýblıkalyq týrnırinde baq synap qaıtqan Temirlan Kólbaı úshinshi orynǵa kóterildi.

Aıta keteıik, ulttyq dárejedegi tóreshi, BQO qazaq kúresi federatsııasynyń vıtse-prezıdenti Artýr Sherǵalıev bastaǵan qazylar barynsha ádil tórelik jasady. Týrnır barysynda beıneqaıtalaý ádisi de qoldanyldy. Daý týdyrǵan tustardy tóreshiler LED-ekrannan qaıtalap qarap, qorytyndy shyǵaryp otyrdy.

BQO dene shynyqtyrý jáne sport basqarmasynyń basshysy Á.Amanbaeva da jarystyń joǵary deńgeıde uıymdastyrylǵandyǵyn jetkizdi.