BQO-da ákim orynbasary jaldamaly qyzmettik páterdiń aqysyn tólemegen
Terekti aýdany ákiminiń orynbasary Qýanysh Sharafýtdınniń tártiptik isi QR Memlekettik qyzmet isteri agenttigi BQO-daǵy Ádep jónindegi keńesiniń otyrysynda qaraldy.
QR Memlekettik qyzmet isteri agenttigi BQO boıynsha departamentiniń basshysy, Ádep jónindegi keńes tóraǵasy Ǵalym Tursynbaev málim etkenindeı, ákimniń orynbasaryna qatysty buzýshylyqtar aýdandaǵy memlekettik organdardy teksergen kezde anyqtaldy.
QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Rýstam Aqmyrzaev keltirgen derekterge qaraǵanda, tekseris barysynda Terekti aýdanynda memlekettik baǵdarlamalar boıynsha salynyp, jalǵa berilgen páterlerden bıýdjetke túsimniń edáýir mólsherde túspegeni belgili boldy. Sonyń ishinde Q.Sharafýtdın qyzmettik páterde turyp, tıisti qujattardy rásimdemegen. Ol basqa da bıýdjettik sala qyzmetkerlerimen birge jalǵa berilgen qyzmettik úıge kelisimshart jasamaǵan, sondyqtan aqysyn tólemegen.
Q.Sharafýtdın aýdan ákiminiń orynbasary qyzmetin 2018 jyldan beri atqaryp, qurylys jáne turǵyn úı-kommýnaldyq sharýashylyq salasyna basshylyq etip keledi. Onyń ústine aýdanda memlekettik baǵdarlamalar boıynsha salynǵan turǵyn úılerdi bóletin komıssııa tóraǵasy da ózi. Jalǵa beriletin páterlerdi turǵyn úı-kommýnaldyq sharýashylyq balansyna alyp, aqysynyń ýaqtyly tólenýin qadaǵalap otyrýy tıis edi.
Sondaı-aq oblystyq tekserý komıssııasynyń tekserisi kezinde Q.Sharafýtdınniń tótenshe jaǵdaılardy joıý jáne aldyn alý maqsatynda bólingen 360 lıtr dızeldi otyn men 400 lıtr AI-92 benzınin durys qujattandyrmaǵany anyqtaldy.
Q.Sharafýtdın turǵyn úı qujattarynyń joqtyǵyna qatysty kinásin moıyndap, aýdanda jalǵa berilgen barlyq páterler boıynsha qujattandyrýdy tártipke keltirýge ýáde berdi. Al indetpen kúres kezinde blokposttardy ornatý kezinde janar-jaǵarmaıǵa qatysty aktilerge qol qoıýǵa ýaqyty bolmaǵanyn aıtty. Qazirgi kezde kiris-shyǵys qujaty joq dızeldi otyn men benzınniń qunyn óz qaltasynan ótegen.
Ádep jónindegi keńes máseleni talqylaı kele, memlekettik qyzmetke kir keltiretin teris qylyqqa jol bergeni úshin Q.Sharafýtdınge qyzmetine tolyq sáıkes emestigi týraly eskertý túrindegi tártiptik jaza qoldaný týraly Terekti aýdany ákimine usynys joldaýdy qajet dep tapty.